மணலி மண்டலம், காமராஜர் சாலையில், 1.53 கோடி ரூபாய் செலவில் கட்டப்பட்டு வரும், நவீன எரியூட்டு தகன மேடையை, சென்னை மேயர் பிரியா, நேற்று காலை பார்வையிட்டார். அதைத் தொடர்ந்து, சுடுகாடு வளாகத்தில், 1.75 ஏக்கர் பரப்பளவில், 250 மகிழம்பூ, பூவரசம், புன்னை மரக் கன்றுகளை நட்டு வைத்தார்.

இதில், கமிஷனர் குமரகுருபரன், வட்டார துணை கமிஷனர்கள், மண்டல உதவி கமிஷனர்கள், மணலி மண்டல குழு தலைவர் ஏ.வி. ஆறுமுகம், பொறுப்பு உதவி கமிஷனர் தேவேந்திரன் உள்ளிட்டோர் பங்கேற்றனர்.

இது குறித்து, பூங்கா துறை அதிகாரி ஒருவர் கூறுகையில் :

சென்னை முழுதும், தினசரி மூன்று லட்சம் லிட்டர் பெட்ரோல், டீசல் உள்ளிட்ட எரிபொருளை மக்கள் பயன்படுகின்றனர். இதன் மூலம் உருவாகும் கார்பன் - டை - ஆக்சைடு, ஐந்து அணுகுண்டுகளுக்கு சமம். அதற்கு, மாற்று தீர்வு ஆக்சிஜன் அதிகளவில் உற்பத்தி செய்வதே. அதற்காக தான். மரக் கன்றுகள் நடப்படுகின்றன.

முதற்கட்டமாக, மணலியில், 250 மரக்கன்றுகள் நடப்பட்டன. திருவொற்றியூரில், 10 ஏக்கர் பரப்பளவில், 1,000 மரக்கன்றுகள் நடப்படவுள்ளது. அதன்படி, சென்னை மாநகராட்சி முழுவதும், ஆண்டுக்கு, 10 லட்சம் மரம் என, நான்கு ஆண்டுகளில், 40 லட்சம் மரங்கள் என்னும் இலக்கை அடைவதே குறிக்கோளாகும்.

இவ்வாறு, அவர் கூறினார்.