சென்னை பல்கலையின் மண்டலங்களுக்கு இடையிலான ஆண்கள் வாலிபால் போட்டி, பெரியமேடு, நேரு விளையாட்டு அரங்கில், நேற்று முன்தினம் மாலை நிறைவடைந்தது.

போட்டியில், லயோலா, டி.ஜி. வைஷ்ணவா, நாசரேத், 'ஏ' மற்றும் 'பி' மண்டல இணைப்பு அணிகள், 'நாக் - அவுட்' முறையில் மோதின. முதல் அரையிறுதியில், டி.ஜி. வைஷ்ணவா கல்லுாரி, 3 - 1 என்ற செட் கணக்கில் லயோலா கல்லுாரியை தோற்கடித்தது.

மற்றொரு அரையிறுதியில், நியூ கல்லுாரி மற்றும் குருநானக் அணிகள் எதிர்கொண்டன.

விறுவிறுப்பான ஆட்டத்தில், 3 - 0 என்ற நேர் செட் கணக்கில் நியூ கல்லுாரி அணி வெற்றி பெற்றது.

நேற்று முன்தினம் மாலை நடந்த இறுதிப் போட்டியில், டி.ஜி. வைஷ்ணவா கல்லுாரி அணி 3 - 1 என்ற செட் கணக்கில் எதிர்த்து விளையாடிய, நியூ கல்லுாரி அணியை தோற்கடித்து, முதலிடத்தை கைப்பற்றி சாம்பியன் கோப்பையை வென்றது.