ராமநாதபுரம் மாவட்டம், பாகனுார் தோமையார்புரத்தைச் சேர்ந்தவர், முருகேஷ். துாத்துக்குடி கடலோர காவல்படையில் பணியாற்றிய இவர், கடந்த 2015ம் ஆண்டு, சென்னை, ஈக்காட்டுத்தாங்கலில் உள்ள ராணுவ மருத்துவமனையில், உடற்தகுதி சான்றிதழ் பெறவந்திருந்தார்.

பின், கோவை செல்ல சென்னை சென்ட்ரல் ரயில் நிலையத்தில் காத்திருந்தார். அப்போது, திண்டுக்கல் மாவட்டம் பழனியை சேர்ந்த சேர்ந்த ராஜா என்பவர், முருகேஷிடம் பேசியுள்ளார். பின், நீலகிரி எக்ஸ்பிரஸ் ரயிலில் முன்பதிவில்லா பெட்டியில் இடம் பிடித்து கொடுத்துள்ளார்.

இருவரும் அருகருகே அமர்ந்து பயணித்த நிலையில், நெருங்கி பழகிய ராஜா, முருகேஷுக்கு குளிர்பானத்தில் மயக்க மருந்து கலந்து கொடுத்துள்ளார்.

அந்த குளிர்பானத்தை குடித்த முருகேஷ் மயங்கிய நிலையில், அவர் அணிந்திருந்த தங்க சங்கிலி, வெள்ளி கை செயின், மொபைல் போன் ஆகியவற்றை, ராஜா அபகரித்து சென்றார்.

இதேபோல மேட்டுப்பாளையத்தைச் சேர்ந்த செந்தில்குமார் என்பவரிடம் ரயில்வே போலீஸ் என அறிமுகமாகிய ராஜா, குளிர்பானத்தில் மயக்க மருந்து கலந்து கொடுத்து, தங்க மோதிரம், 3,000 ஆயிரம் ரூபாயை அபகரித்து சென்றுள்ளார்.

இதுகுறித்து, சென்னை சென்ட்ரல் ரயில்வே போலீசார் வழக்குப்பதிவு செய்து, ராஜாவை கைது செய்தனர்.

இந்த இரண்டு வழக்குகளின் விசாரணை சென்னை முதன்மை அமர்வு நீதிமன்ற நீதிபதி எஸ்.கார்த்திகேயன் முன் நடந்தது. போலீசார் தரப்பில், மாநகர முதன்மை குற்றவியல் அரசு வழக்கறிஞர் ஜி.தேவராஜன் ஆஜரானார்.

வழக்கை விசாரித்த நீதிபதி, ராஜா மீதான குற்றச்சாட்டு சந்தேகத்துக்கு இடமின்றி, அரசு தரப்பால் நிரூபிக்கப்பட்டு உள்ளது என கூறி, இரு வழக்குகளிலும் அவருக்கு தனித்தனியாக 18 மாதம் சிறை தண்டனை, மொத்தம் 10 ஆயிரம் அபராதம் விதித்து தீர்ப்பளித்தார்.