கவரைப்பேட்டை அடுத்த, ஆர்.என்.கண்டிகை கிராமத்தைச் சேர்ந்தவர்கள் ஜெயராஜ், 18, சந்தோஷ், 21, பிரவீன்குமார், 21. மூன்று பேரும், அருகில் அய்யர்கண்டிகை கிராமத்தில் உள்ள தனியார் கிடங்கில் சுமை துாக்கும் தொழிலாளர்களாக, பகுதி நேர வேலை பார்த்து வருகின்றனர்.

நேற்று காலை, கிடங்கில் லோடு ஏற்ற, ஹரியானா பதிவு எண் லாரி ஒன்று வந்தது. அதன் டிரைவரான, ஹரியானா மாநிலத்தைச் சேர்ந்த ஜூனைட், 30, என்பவருக்கும், மேற்கண்ட மூன்று பேருக்கும் இடையே, லோடு ஏற்றுவதில் தகராறு ஏற்பட்டுள்ளது.

கோபம் அடைந்த லாரி டிரைவர், மூன்று பேர் மீதும் லாரியை ஏற்றியதாக கூறப்படுகிறது. லாரியில் சிக்கி ஜெயராஜ், சந்தோஷ் ஆகியோரின் கால்கள் நசுங்கின. இருவரும் சென்னையில் உள்ள தனியார் மருத்துவமனையில் அனுமிதிக்கப்பட்டனர்.

பிரவீன்குமார், லேசான காயம் அடைந்தார். சம்பவத்தை கண்ட சக தொழிலாளர்கள், லாரி டிரைவரை நையப்புடைத்தனர். படுகாயம் அடைந்த அவர், ஸ்டான்லி அரசு மருத்துவமனையில் சிகிச்சை பெற்று வருகிறார். இந்த சம்பவம் குறித்து, கவரைப்பேட்டை போலீசார் விசாரிக்கின்றனர்.