ஆழ்கடலில் மீன் பிடிக்க சென்ற, 100க்கும் மேற்பட்ட விசைப்படகுகள், விடுமுறை நாளான நேற்று, காசிமேடு கடற்கரைக்கு திரும்பின. அதிகாலை முதலே, சென்னை மற்றும் புறநகர் பகுதியினர், மற்ற மாவட்டங்களை சேர்ந்த மக்கள் குவிந்தனர்.

ஆடி மாதம் என்பதால் அம்மன் கோவில்களில் மட்டுமின்றி, வீடுகளிலும் கூழ்வார்த்தல் நிகழ்ச்சி நடக்கும். அம்மனுக்கு வைக்கப்படும் படையலில், மீன் உணவு பிரதானமாக இருக்கும் என்பதால், வழக்கமான ஞாயிற்றுக் கிழமைகளை விட நேற்று அதிக மக்கள் கூடினர்.

முளியன், பாறை, கடம்பா உள்ளிட்ட மீன் வகைகள் அதிகம் விற்பனைக்கு வந்தன. இருப்பினும், மக்கள் வருகை அதிகரிப்பால், வரத்து குறைவாலும், மீன் வகைகளின் விலை கடுமையாக உயர்ந்தது. பொதுமக்கள் பேரம் பேசி, மீன் வாங்கி சென்றனர்.

400 கிலோ பால் சுறா

காசிமேடைச் சேர்ந்தவர் ஜனார்த்தனன் சரண். இவரது விசைப்படகில், கடந்த வாரம், 400 கிலோவில், மூன்று பால்சுறா மீன்கள் வலையில் சிக்கின.

நேற்று கரைக்கு கொண்டு வரப்பட்ட இந்த மீன், கிலோ 300 ரூபாய் என, 3.5 லட்சம் ரூபாய்க்கு விற்பனையாகும் எனவும், கேரளா, ஆந்திராவிற்கு ஏற்றுமதி செய்ய உள்ளதாகவும் மீனவர்கள் தெரிவித்தனர்.