சென்னை மற்றும் புறநகர் பகுதிகளில், நேற்று முன்தினம் இரவு முதல் மழை பெய்து வருகிறது. பகலிலும் விட்டு விட்டு கன மழை பெய்தது.

இதன் காரணமாக, சென்னையின் தாழ்வான பகுதிகளில் ஆங்காங்கே மழைநீர் தேங்கியுள்ளது. முக்கிய சாலைகளில் கூட, மழைநீர் தேங்கி, போக்குவரத்து நெரிசல் ஏற்பட்டது.

தொடர் மழையால் தண்ணீர் வடியாமல், சோழிங்கநல்லுார், செம்மஞ்சேரி, துரைப்பாக்கம், வேளச்சேரி, கிண்டி, அடையாறு, திருவான்மியூர் பகுதியில் கடும் போக்குவரத்து நெரிசல் ஏற்பட்டது.

ஓ.எம்.ஆரில் கடுமையான நெரிசலால், 1 கி.மீ., துாரத்தை கடக்க, அரை மணி நேரம் வரை ஆனது. மேடவாக்கம் அடுத்த நன்மங்கலத்தில் முட்டிக்கால் அளவுக்கு தண்ணீர் தேங்கியது.

ஆலந்துார் மண்டலம், பழவந்தாங்கல், பூந்தோட்டம் பகுதியிலும், ஆதம்பாக்கத்தில் சில தெருக்களிலும், மழைநீர் தேங்கியது. தாம்பரத்தில் இந்து மிஷன் மருத்துவமனை எதிரே இலக ரக வாகன சுரங்கப்பாதை, பெரம்பூர் சுரங்கப்பாதையில் தண்ணீர் புகுந்தது.

மழையுடன் காற்றடித்ததால், அடையாறு, வேளச்சேரி பகுதியில் சில இடங்களில், மரங்களின் கிளைகள் முறிந்து விழுந்தன. வலுவிழந்து நின்ற மரங்கள் வேரோடு சாய்ந்தன.

வேளச்சேரி, தண்டீஸ்வரன் பிரதான சாலையில் புங்கை மரம் விழுந்ததால், 'சுசுகி - பலேனா' கார் சேதமடைந்தது. சில இடங்களில் தெருவிளக்குகளும் சேதமடைந்தன. இயந்திர நுழைவு பாதாள சாக்கடை மூடிகள் வழியாக, கழிவுநீர் வெளியேறி, மழைநீருடன் சாலையில் பெருக்கெடுத்து ஓடியது.

சென்னையின் பிரதான பகுதிகளான தி.நகர், வடபழனி, மணலி, கொளத்துார்

தொடர்ச்சி ௪ம் பக்கம்

உள்ளிட்ட பல இடங்களிலும் மழையால் இயல்புநிலை பாதிக்கப்பட்டுள்ளது.

ஒரு நாள் மழையில் சென்னையில் நீர் தேங்கி பாதிப்பு, போக்குவரத்து நெரிசல், மின் தடை உள்ளிட்ட பிரச்னைகள் ஏற்பட்டுள்ள நிலையில், அடுத்த நான்கு நாட்களுக்கு, சென்னை மற்றும் புறநகர் பகுதிகளில் கனமழை தொடரும் என, வானிலை ஆய்வு மையம் எச்சரித்துள்ளது.

அதனால், பாதுகாப்பு, முன்னெச்சரிக்கை பணிகளில், மாநகராட்சி நிர்வாகம் மும்முரமாக ஈடுபட்டுள்ளது.

இதுகுறித்து, சென்னை மாநகராட்சி துணை மேயர் மகேஷ்குமார் கூறியதாவது:

சென்னையில் மழைநீர் தேங்காதவாறு தடுப்பு நடவடிக்கைகள் எடுக்கப்பட்டுள்ளது. கடந்த மழைக்கு மழைநீர் தேங்கிய மற்றும் தாழ்வான பகுதிகள் அனைத்தும், மாநகராட்சி தலைமை அலுவலகத்தில் உள்ள, ஒருங்கிணைந்த கட்டளை மற்றும் கட்டுப்பாட்டு மையம் வாயிலாக கண்காணிக்கப்படுகிறது.

அதிக கனமழையின்போது, சாலையில் மழைநீர் தேங்காமல் இருக்க, வார்டுக்கு 10 பணியாளர்கள் என, 2,000 பேர் வரை நியமித்து கொள்ள, உதவி பொறியாளர்களுக்கு அனுமதி வழங்கப்பட்டுள்ளது. இவர்கள், ஐந்து நாட்கள் தற்காலிக முறையில் பணியாற்றுவர். மழைநீர் கால்வாய்க்கு செல்லும் வண்டல் வடிதொட்டிகளில் ஏற்படும் அடைப்புகளை சரி செய்யும் பணியில் ஈடுபடுத்தப்பட்டுள்ளனர்.

இதேபோல், ஒவ்வொரு மழை பாதிப்பின்போது, தற்காலிக அடிப்படையில் பணியாளர்கள் நியமிக்கப்பட்டு, மழை வெள்ள பாதிப்பை தடுக்கும் பணியில் ஈடுபடுவர்.

தவிர, 1,223 மோட்டார் பம்புகள் தயார் நிலையில் வைக்கப்பட்டுள்ளன. அதற்கான டீசல் போதியளவில் கொள்முதல் செய்யப்பட்டு உள்ளது.

தாழ்வான பகுதிகளில் அவசர தேவைக்கு, 103 படகுகள் பயன்படுத்தப்படும். மேலும், மழை தொடர்பான, '1913' என்ற எண்ணில் பொதுமக்கள் அளிக்கும் புகார்களுக்கு உடனடியாக தீர்வு காணவும் அறிவுறுத்தப்பட்டுள்ளது.

சென்னையை பொறுத்தவரை, பெரியளவில் மழை பாதிப்பு இருக்காது என்றாலும், தீவிர மழை பாதிப்பு வந்தாலும் சமாளிக்கும் வகையில், விழிப்புடன் பணியாற்றி வருகிறோம்.

இவ்வாறு அவர் கூறினார்.

24 மணி நேரமும்

ஆவில் பாலகம்

கனமழை முன்னெச்சரிக்கை நடவடிக்கையாக, அம்பத்துார் பால்பண்ணை கேட், அண்ணா நகர் குட்நஸ் டவர் பூங்கா, மாதவரம் பால்பண்ணை, வண்ணாந்துரை, பெசன்ட் நகர், அண்ணாநகர் கிழக்கு, வசந்தம் காலனி, சோழிங்கநல்லுார் பால்பண்ணை், விருகம்பாக்கம், மயிலாப்பூர் சி.பி.ராமசாமி சாலை ஆகிய பாலகங்கள், 24 மணி நேரமும் இயங்கும். ஒருவருக்கு அதிகபட்சம் நான்கு பால் பாக்கெட் மட்டுமே வழங்கப்படும். பொதுமக்களுக்கு தங்கு தடையின்றி, பால் வினியோகம் செய்யப்படும்.

- ஆவின் நிர்வாகம்