மேயர் ராதாகிருஷ்ணன் கிளப் சார்பில், மாநில அளவிலான மின்னொளி கூடைப்பந்து போட்டி, எழும்பூரில் உள்ள மாநகராட்சி விளையாட்டு மைதானத்தில் நடக்கிறது. 34 ஆண்கள் அணி, 14 பெண்கள் அணிகள் பங்கேற்றுள்ளன. ஆண்களுக்கு 'லீக்' கம் 'நாக் - அவுட்' முறையிலும், பெண்களுக்கு 'நாக் அவுட்' முறையிலும் போட்டிகள் நடக்கின்றன.

நேற்று முன்தினம் மாலை நடந்த ஆடவருக்கான ஆட்டத்தில், லயோலா கல்லுாரி அணி, டொர்னாடோஸ் அணியை எதிர்த்து விளையாடியது. இதில் லயோலா கல்லுாரி அணி 81 - 45 என்ற புள்ளிக்கணக்கில், டொர்னாடோஸ் அணியை வீழ்த்தி வெற்றி பெற்றது.

மற்றொரு ஆடவருக்கான போட்டியில் தமிழக போலீஸ் அணி 75 - 33 என்ற புள்ளிக்கணக்கில் நாகன் எம்.பி.சி., அணியை வீழ்த்தி, வெற்றியை பதிவு செய்தது.

அடுத்து நடந்த பெண்கள் பிரிவு முதல் போட்டியில் எஸ்.டி.ஏ.டி., மகளிர் அணி மற்றும் கே.பி.ஆர்., கோவை அணிகள் மோதின. இதில் எஸ்.டி.எ.டி., மகளிர் அணி 48 - 36 என்ற புள்ளியில், கே.பி.ஆர்., கோவை அணியை வீழ்த்தி வெற்றி பெற்றது.

மற்றொரு போட்டியில் ரைசிங் ஸ்டார் அணி, பீனிக்ஸ் இந்தியன் எ.சி.எ., அணியை எதிர்த்து மோதியது. இதில் 72 - 45 என்ற புள்ளியில் வெற்றிப்பெற்றது. கடைசி போட்டியில், தமிழக போலீஸ் மகளிர் அணி 59 - 40 என்ற புள்ளிக்கணக்கில் கோல்டன் ஈகிள் அணியை வீழ்த்தியது.