வடசென்னை வளர்ச்சி திட்டத்தின் கீழ், சி.எம்.டி.ஏ., சார்பில் 46.50 கோடி ரூபாய் மதிப்பீட்டில் கட்டப்படும் திருவொற்றியூர் அரசு தொழில்நுட்பக் கல்லுாரி - அரசு தொழில் பயிற்சி நிலைய கட்டுமான பணிகளை, நேற்று காலை ஹிந்து சமய அறநிலையத்துறை அமைச்சரும், சி.எம்.டி.ஏ., தலைவருமான சேகர்பாபு பார்வையிட்டார்.

தொடர்ந்து, திருவொற்றியூர், தேரடி - ஈசாணி மூர்த்தி கோவில் தெருவில், கச்சாலீஸ்வரர் கோவிலுக்கு சொந்தமான இடத்தில் நடைபெற்று வரும், திருவள்ளுவர் கோவில் கட்டுமான பணிகளை அமைச்சர் ஆய்வு செய்தார்.

அப்போது, கட்டுமான பணிகள் கிடப்பில் போடப்பட்டிருப்பதை கண்டு அதிர்ச்சி அடைந்த அவர், ஹிந்து சமய அறநிலையத்துறை அதிகாரிகள் மற்றும் கட்டுமானத் துறை அதிகாரிகளை தொடர்பு கொண்டு பணிகள் நடக்காதது குறித்து கேள்வி எழுப்பினார்.

அப்போது, கட்டுமான துறை அதிகாரிகள், பணி நடக்கும் இடத்தில் இருப்பதாக கூறினர். உடனே, வீடியோ அழைப்பில் அந்த அதிகாரியை தொடர்பு கொண்ட அமைச்சர் சேகர்பாபு, கட்டுமான பணி நடக்கும் இடத்திற்கு வந்திருப்பதை காண்பித்தார்.

மேலும், பணிகள் நடந்தே இரண்டு மாதம் இருக்கும் போல் தெரிகிறது. விரைவில் பணிகளை துவங்கி, அந்த புகைப்படங்களை எனக்கு அனுப்ப வேண்டும் என, கடிந்துக் கொண்டார்.

இதனால், சிறிது நேரம் அப்பகுதியில் சலசலப்பு ஏற்பட்டது.