குன்றத்துார் மலையில், பழமைவாய்ந்த சுப்பிரமணிய சுவாமி கோவில் உள்ளது. கோவில் அமைந்துள்ள பகுதி ஹிந்து சமய அறநிலையத் துறை கட்டுப்பாட்டிலும், மலையின் மற்ற பகுதிகள், மத்திய தொல்லியல் துறை கட்டுப்பாட்டிலும் உள்ளன.

இங்கு 1956 - 57ம் ஆண்டில் நடந்த அகழாய்வில் பெருங்கற்கால மக்களின் வாழ்விடங்கள், கல்லறைகள், ஆயுதங்கள் கண்டறியப்பட்டன.

இதனால், குன்றத்துார் மலை சர்வே எண் 1151/1ல் 22.90 ஏக்கர் பரப்பளவு மற்றும் மலை அடிவாரத்தில் 200 மீட்டர் சுற்றளவு, பாதுகாக்கப்பட்ட நினைவுச்சின்னத்தின் ஒழுங்குமுறை பகுதிக்குள் உள்ளதாக, மத்திய தொல்லியல் துறையினர் அறிவித்துள்ளனர்.

தடுப்பு வேலி இந்நிலையில், குன்றத்துார் மலை மற்றும் மலையின் அடிவாரத்தை சுற்றியுள்ள பாதுகாக்கப்பட்ட பகுதிகள் பராமரிப்பின்றி உள்ளன. இதனால், மலை மீது ஆக்கிரமித்து கட்டப்படும் வீடுகளின் எண்ணிக்கை ஆண்டுதோறும் அதிகரித்து வருகிறது.

இதுகுறித்து, சமூக ஆர்வலர்கள் கூறியதாவது:

குன்றத்துார் மலை மற்றும் மலை அடிவாரத்தில் ஆக்கிரமித்து கட்டப்பட்டுள்ள வீடுகளுக்கு குன்றத்துார் நகராட்சி நிர்வாகம் சார்பில் சாலை, குடிநீர் வசதி ஏற்படுத்தி கொடுக்கப்பட்டுள்ளது. மின் வாரியம், சார்பில் மின் இணைப்பு தாராளமாக வழங்கப்பட்டுள்ளது.

சார் - பதிவாளர் அலுவலகத்தில் பத்திரம் பதிவு செய்யப்படுவதால், மலை அடிவாரத்தில் தொல்லியல் துறையால் பாதுகாக்கப்பட்ட பகுதியாக அறிவிக்கப்பட்ட நிலங்களின் விற்பனையும், தடையின்றி நடக்கிறது.

அரசியல் தலையீட்டால் மலை மீதுள்ள ஆக்கிரமிப்பு வீடுகளை அகற்ற, இதுவரை அதிகாரிகள் முயற்சி எடுக்கவில்லை. ஒரு வீடுகளை கூட இதுவரை அகற்றாததால், ஒருவரை பார்த்து ஒருவர் ஆக்கிரமித்து, துணிச்சலாக வீடுகளை கட்டி வருகின்றனர். கடந்த 15 ஆண்டுகளில் அதிக ஆக்கிரமிப்புகள் நடந்துள்ளன.

குன்றத்துார் மலையடிவாரம் மற்றும் மலை மீது ஆக்கிரமித்து, 500க்கும் மேற்பட்ட வீடுகள் கட்டப்பட்டுள்ளன. இதனால், தொல்லியல் சின்னங்கள் சேதமாகின்றன. ஆரம்பத்திலேயே, ஆக்கிரமிப்பை அகற்ற அதிகாரிகள் நடவடிக்கை எடுத்திருந்தால், இத்தனை வீடுகள் மலையில் அமைந்திருக்காது.

வரும் காலங்களில், ஆக்கிரமிப்பை அகற்ற அரசு நடவடிக்கை எடுக்கவில்லை என்றால், மலை முழுதும் ஆக்கிரமிக்கப்படும் ஆபத்து உள்ளது. ஆக்கிரமிப்பு வீடுகளை அகற்றி, மலையைச் சுற்றி தடுப்பு வேலி அமைக்க வேண்டும்.

இவ்வாறு அவர்கள் கூறினர்.

வருவாய் துறை அதிகாரி ஒருவர் கூறுகையில், 'குன்றத்துார் மலை ஆக்கிரமிப்பு குறித்தும், ஆக்கிரமிப்பை அகற்றுவது குறித்தும், இதுவரை எந்த புகாரும் வரவில்லை' என்றார்.

முன் அனுமதி மத்திய தொல்லியல் துறை அதிகாரிகள் கூறியதாவது:

குன்றத்துார் மலை மற்றும் மலை அடிவாரத்தில் உள்ள ஏழு சர்வே எண்களில் உள்ள நிலங்கள், பாதுகாக்கப்பட்ட நினைவு சின்னத்தின், பாதுகாக்கப்பட்ட ஒழுங்குமுறை பகுதிகளுக்குள் உள்ளன.

பழங்கால நினைவு சின்னம் மற்றும் தொல்பொருள் தளம் மற்றும் எச்சங்கள் கண்டறியப்பட்ட இப்பகுதியில், அனைத்து திசைகளிலும், 200 மீட்டர் துாரம் வரை ஒழுங்குபடுத்தப்பட்ட பகுதிக்குள் வரும்.

எனவே, குன்றத்துார் மலை மற்றும் அதை சுற்றியுள்ள இடங்களில் பட்டா, கட்டட அனுமதி வழங்க வேண்டாம் என, சென்னை பெருநகர வளர்ச்சி குழுமமான சி.எம்.டி.ஏ., மற்றும் குன்றத்துார் சார் - பதிவாளர் அலுவலகம், குன்றத்துார் நகராட்சி அலுவலகத்திற்கு கடிதம் அனுப்பி உள்ளோம்.

மேலும், இந்த ஒழுங்குபடுத்தப்பட்ட பகுதியில் ஏதேனும் கட்டடம் கட்டியிருந்தாலோ அல்லது நிலம் வைத்திருந்தாலோ, அந்த நபரும் இந்த நிலத்தில் கட்டடம் கட்டுதல், ஏற்கனவே உள்ள கட்டடத்தை பழுதுபார்த்தல், புதுப்பித்தல் பணி செய்ய, முன் அனுமதி பெற வேண்டும்.

இவ்வாறு அவர்கள் கூறினர்.