எதிர் திசையில் வரும்வாகனங்களால் ஆபத்து

பள்ளிக்கரணை சிக்னலில் இருந்து, வேளச்சேரி - தாம்பரம் பிரதான ஒருவழி சாலையில், ஒரு மணி நேரத்தில், 3,000 வாகனங்கள் கடக்கின்றன. காமகோட்டி நகர் சிக்னல் - ஆயில் மில் வரையும், பள்ளிக்கரணை, துலுக்கானத்தம்மன் கோவில் அருகே உள்ள சாலை சந்திப்பும் குறுகலாக உள்ளது. இதனால் இங்கு வாகன நெரிசல் மிகுந்து காணப்படுகிறது.
இருசக்கர வாகன ஓட்டிகள், பள்ளிக்கரணை சிக்னலில் இருந்து, வேளச்சேரி -- தாம்பரம் ஒருவழி சாலையில் எதிர் திசையில் சென்று, செல்வம் நகர் பிரதான சாலை வாயிலாக காமகோட்டி நகர் சிக்னலை அடைகின்றனர். அதிலிருந்து வேளச்சேரி, பல்லாவரம், ஓ.எம்.ஆர்., நோக்கி செல்கின்றனர்.
இந்த சாலையோரம் மின் வாரிய பணிக்காக தோண்டப்பட்ட பள்ளத்தை முறையாக சமன்படுத்தாமல் மண்ணை கொட்டி மூடியுள்ளனர். இதனால், எதிர் திசையில் வரும் இருசக்கர வாகனங்கள், மணல் குவியலால் சறுக்கி விழுந்து விபத்தில் சிக்குகின்றனர். முக்கிய சந்திப்பு பகுதியான இங்கு, போலீசார் கண்காணிப்பு பணியில் ஈடுபட வேண்டும் என கோரிக்கை எழுந்துள்ளது.