சென்னையின் எப்.சி., - இங்கிலாந்து நார்விச் சிட்டி எப்.சி., கிளப்கள் இணைந்து, பள்ளிகளுக்கு இடையிலான கால்பந்து போட்டியை, சேத்துப்பட்டு எம்.சி.சி., பள்ளி மைதானத்தில் நடத்துகின்றன.

இதில், யூ - 12, யூ - 14 பிரிவினருக்கு மட்டும், போட்டிகள் நடக்கின்றன. 'லீக்' மற்றும் 'நாக் - அவுட்' முறையில் நடக்கும் இப்போட்டியில், இரு பிரிவிலும் தலா 32 அணிகள் என, மொத்தம் 64 அணிகள் பங்கேற்கும் இப்போட்டி, பிப்., மூன்றாம் வாரம் வரை தொடர்ந்து நடக்கிறது.

நேற்று நடந்த யூ - 12 பிரிவில், எம்.சி.சி., பள்ளி மற்றும் அஞ்சுமன் மெட்ரிக் பள்ளிகளுக்கு இடையிலான ஆட்டம், 0 - 0 என்ற கணக்கில் 'டிரா'வில் முடிந்தது.

மற்றொரு ஆட்டத்தில், எழும்பூர் டான்பாஸ்கோ பள்ளி, 2 - 0 என்ற கோல் கணக்கில், பல்லவன் சாலை கேந்திரிய வித்யாலயா பள்ளியை வீழ்த்தியது.

மயிலாப்பூர், செட்டிநாடு வித்யாஷ்ரம் மற்றும் அண்ணா நகர் எஸ்.பி.ஓ.ஏ., பள்ளிகளுக்கு இடையிலான ஆட்டம், 0 - 0 என்ற கணக்கில் 'டிரா'வில் முடிந்தது.

அதேபோல், யூ - 14 பிரிவில் சாந்தோம் பள்ளி, 5 - 1 என்ற கோல் கணக்கில், எழும்பூர் டான்பாஸ்கோ பள்ளியை தோற்கடித்தது. பல்லவன் சாலை கேந்திரிய வித்யாலயா மற்றும் சேத்துப்பட்டு எம்.சி.சி., பள்ளிகளுக்கு இடையிலான ஆட்டம், 2 - 2 என்ற கோல் கணக்கில், 'டிரா'வில் முடிந்தது.