தமிழ்நாடு டென்னி ஸ் சங்கம் மற்றும் இந்தியன் நிறுவனம் இணைந்து, தேசிய அளவில், நான்காவது இந்தியன் ஏ.ஐ.டி.ஏ., டென்னிஸ் தொடரை, நுங்கம் பாக்கம் எஸ்.டி.ஏ.டி., டென்னிஸ் மைதானத்தில் நடத்தி வருகின்றன.

இதன் காலிறுதி போட்டி நேற்று நடந்தது. இதன் இரண்டாவது சுற்றில், தமிழகத்தின் மாரியப்பன், கர்நாடகாவின் அணில் டி அல்மைடாவை எதிர்த்து மோதினார். இதில், மாரியப்பன் 9 - 3 என்ற செட் கணக்கில் வென்று, அரையிறுதிக்கு தகுதி பெற்றார்.

அடுத்து நடந்த போட்டியில், கர்நாடகாவின் சிவபிரசாத்தை, தமிழகத்தின் பாலச்சந்தர் எதிர்கொண்டார். இதில், பாலச்சந்தர் 9 - 2 என்ற செட் கணக்கில் வென்று, அரையிறுதிக்கு முன்னேறினார்.

கடைசி காலிறுதி போட்டியில், தமிழகத்தின் கார்த்திக் கருணாகரன், கர்நாடகாவின் பாண்டுரங்க சுவாமியை எதிர்த்து மோதினார். இதில், கார்த்திக் 9 - 2 என்ற செட் கணக்கில் வென்று அரையிறுதிக்கு சென்றார்.

அதேபோல், ஆடவருக்கான இரட்டையர் போட்டியில், தமிழகத்தின் ஜேம்ஸ் - அருள், மாரியப்பன் - கார்த்திக் கருணாகரன், சேகர் - பாலச்சந்தர் ஜோடி காலிறுதிக்கு தகுதிபெற்றுள்ளனர்.