இந்நிலையில், தி.மு.க., அரசு பொறுப்பேற்ற பின், தேனாம்பேட்டை கதீட்ரல் சாலையில், அ.தி.மு.க., நிர்வாகி ஆக்கிரமிப்பில் சிக்கியிருந்த அரசு நிலம் மீட்கப்பட்டது. இங்கு, 6.09 ஏக்கரில், முன்னாள் முதல்வர் கருணாநிதி பெயரில் பூங்கா அமைக்கப்பட்டு உள்ளது. அ.தி.மு.க., ஆட்சியில் அமைக்கப்பட்ட செங்காந்தள் பூங்காவும், இதோடு இணைக்கப்பட்டுள்ளது.

இந்த பூங்காவிற்கு, 2023 பிப்ரவரியில் அடிக்கல் நாட்டப்பட்டது. திட்ட மதிப்பீட்டின்படி, அப்போது 25 கோடி ரூபாய் ஒதுக்கப்பட்டது. பணிகள் முடிந்து, 2024 அக்டோபரில் பூங்கா திறக்கப்பட்டபோது, 49.90 கோடி ரூபாய் செலவிடப்பட்டதாக கூறப்பட்டது.

இந்த நிதியில், 16 மீட்டர் உயரத்தில், 10,000 சதுர அடியில் கண்ணாடி மாளிகை, 23 அலங்கார வளைவுகள், சூரியகாந்தி கூழாங்கல் பாதை, மரவீடு, இசை நீரூற்று, குழந்தைகள் விளையாடும் இடம், பசுமை நிழற்கூடாரம், பாரம்பரிய காய்கறி தோட்டம், கேன்டீன் உள்ளிட்ட பல வசதிகள் செய்யப்பட்டதாக அறிவிக்கப்பட்டது.

இழுபறி பூங்காவை பார்வையிட, பெரியவர்களுக்கு 100 ரூபாய்; சிறியவர்களுக்கு 50 ரூபாய் கட்டணம் வசூலிக்கப்பட்டு வருகிறது. பல சிறப்பு அம்சங்களை பயன்படுத்த, தனியாக 600 ரூபாய் வரை வசூல் நடக்கிறது.

பூங்கா திறக்கப்பட்டு ஓராண்டு ஆகியும், இன்னும் பணிகள் முடியவில்லை. 'சூப்பர் ட்ரீ' எனப்படும் கோபுரம் அமைக்கும் பணிகள் இழுபறியாக உள்ளன.

தி ட்ட அறிக்கையில் தெரிவித்தபடி, இந்த பூங்காவையும், எதிரே உள்ள செம்மொழி பூங்காவையும் இணைக்கும் வகையில், எஸ்கலேட்டர் வசதியுடன் கூடிய நடை மேம்பாலம் அமைக்கப்படவில்லை. ஆனால், பூங்காவுக்கான செலவு தொகை, தற்போது 60 கோடி ரூபாயை தொட்டுள்ளது.

தமிழக அரசின் பல்வேறு துறைகளின் பணிகளுக்கு, மத்திய தணிக்கை துறை வாயிலாக, ஆண்டு தோறும் தணிக்கை செய்யப்படுகிறது. தோட்டக்கலைத் துறைக்கு ஐந்து ஆண்டுகளுக்கு ஒருமுறை மட்டுமே மத்திய தணிக்கை நடக்கிறது.

அதிர்ச்சி இதனால், தோட்டக்கலைத் துறை அலுவலர்களை வைத்தே, உள் தணிக்கை மேற்கொள்ளப்படுகிறது. இதை பயன்படுத்தி முறைகேடுகள் நடக்கும் அதிர்ச்சி தகவல் அம்பலமாகியுள்ளது.

தோட்டக்கலைத்துறை வட்டாரத்தில் கூறப்படுவதாவது:

க லைஞர் பூங்காவிற்கு திட்ட அறிக்கை தயாரித்த போதே, அதில் அனைத்து அம்சங்களும் இடம்பெறும் வகையில், 25 கோடி ரூபாய் நிதி ஒதுக்கப்பட்டது. அதை விட, 35 கோடி ரூபாய் கூடுதலாக செலவு செய்யப்பட்டுள்ளதாக, தற்போது கணக்கு காட்டப்பட்டுள்ளது .

கூடுதல் செலவு செய்ய வேண்டும் என்றால், வேளாண் துறை செயலர், நிதித்துறை செயலர் அடங்கிய ஆட்சிமன்ற குழு அனுமதி அவசியம். நடப்பாண்டு ஒருமுறை மட்டுமே இந்த குழு கூடியது. இந்த கூட்டத்தில் நிதித்துறை செயலர் ஒப்புதல் வழங்கினாரா என்பது மர்மமாக உள்ளது.

நிதித்துறையில் இருந்து ஐ.ஏ.எஸ்., அந்தஸ்திலான சிறப்பு அதிகாரியை நியமித்து, தோட்டக்கலைத் துறையில் ஆண்டு தணிக்கை மேற்கொண்டால் முறைகேடுகளை கட்டுப்படுத்தலாம்.

இவ்வாறு தோட்டக்கலைத் துறை வட்டாரங்கள் கூறின.

சிங்கப்பூர் பூங்காவின் மினியேச்சர் இது! ''ஒரு இடத்தை மக்கள் தொடர்ந்து பயன்படுத்தும்போது தான், தேவைகள் என்ன என்பது தெரியவரும். அதற்கேற்ப ஒப்புதல் பெற்று, கூடுதல் வசதிகள் செய்யப்பட்டு உள்ளன. திட்ட மதிப்பீட்டில், 200 மீட்டர் ஜிப்லைன் அமைக்க நிதி ஒதுக்கப்பட்டது. பின், 500 மீட்டராக அமைக்கப்பட்டது. நடைபாதைகளும் விரிவுப்படுத்தப்பட்டு உள்ளன. சிங்கப்பூரில் உள்ள தோட்டக்கலை பூங்கா, 1,000 கோடி ரூபாய் செலவில் அமைக்கப்பட்டு உள்ளது. அந்த பூங்காவிற்கு இணையான வசதிகளுடன், அதன் மினியேச்சர் பூங்காவாக கலைஞர் பூங்கா உருவாக்கப்பட்டு உள்ளது. நிதித்துறையினர் எடுத்தவுடன் ஒப்புதல் தர மாட்டார்கள். திட்டத்தால் என்ன பயன், செலவு தேவை தானா என ஆலோசித்துத்தான் ஒப்புதல் வழங்கியுள்ளனர். இதில், பல்வேறு தொழில்நுட்ப விபரங்கள் உள்ளன. நான் இப்போது தான் இந்த பொறுப்பேற்றுள்ளேன். முன்பிருந்த அதிகாரிகளுக்கு கூடுதல் விபரம் தெரியும். - பாலசுப்பிரமணியன், துணை இயக்குநர், தோட்டக்கலைத்துறை.

ஜிப்லைன்

அடிக்கடி 'மக்கர்'

பூங்காவில், 'ஜிப்லைன்' எனப்படும் கயிற்றில் தொங்கி சாகசம் செய்து, பூங்காவை சுற்றிவரும் வசதி செய்யப்பட்டு உள்ளது. இதன் பராமரிப்பு பணி, தனியார் நிறுவனத்திடம் தரப்பட்டுள்ளது. அந்த நிறுவனம் வாயிலாக முன்பதிவு செய்வோர் மட்டுமே, ஜிப்லைன் வசதியை பயன்படுத்த முடியும். ஜிப்லைன் அடிக்கடி மக்கராகி பாதியில் நிற்பதால், பார்வையாளர்கள் அந்தரத்தில் தொங்கும் நிலை ஏற்படுகிறது. இயற்கை சூழல் மாறினால், ஜிப்லைன் சேவை நிறுத்தப்படுகிறது. பணம் கட்டியும் பலம் ஏமாறுகின்றனர். அதனால், தகுதியான நிறுவனம் வாயிலாக ஜிப்லைன் அமைக்கப்பட்டு உள்ளதா என்ற சந்தேகம் எழுகிறது

- நமது நிருபர் -.