கோவை சரவணம்பட்டி அடுத்த சின்னவேடம்பட்டி, 'ராமன் விஹார்' குடியிருப்பில் வியோமா பிரியா, 8, மற்றும் ஜெயான் ரெட்டி, 6 ஆகிய இரு குழந்தைகள் நேற்று முன்தினம், அங்குள்ள பூங்காவில் விளையாடிக் கொண்டிருந்தபோது, மின்சாரம் தாக்கி உயிரிழந்தனர்.

இதுபோன்ற சம்பவங்கள் நடக்காமல் இருக்க, உரிய முன்னெச்சரிக்கை நடவடிக்கைகளை மேற்கொள்ள அறிவுறுத்தப்பட்டுள்ளது.

இதுகுறித்து, போலீசார் வெளியிட்டுள்ள அறிக்கை:

n அடுக்குமாடி குடியிருப்பில் வசிப்பவர்கள், தங்களது பகுதிகளில் உள்ள மின்மாற்றிகள், பூங்காக்கள் மற்றும் பிற கட்டடங்களில் உள்ள மின் இணைப்புகள் அனைத்தும் பாதுகாப்பான முறையில் பொருத்தப்பட்டிருக்கிறதா அல்லது இணைக்கப்பட்டுள்ளதா என்பதை உறுதி செய்ய வேண்டும்.

n தங்களது அசோசியேஷன் வாயிலாக, பயிற்சி பெற்ற எலக்ட்ரீசியன், மின் வாரிய ஊழியர்களைக் கொண்டு, அவ்வப்போது பராமரிக்க வேண்டும்.

n மின் இணைப்புகளை ஒருபோதும் ஈரக் கைகளால் தொடாதீர்கள்.

n மின்னல் மற்றும் இடியுடன் கூடிய மழைநேரங்களில், மின்சாதனப் பொருட்களை தேவையில்லாமல் உபயோகப்படுத்த வேண்டாம்.

n மின்சாதனப் பொருட்களை உபயோகித்த பின், மின் இணைப்பிலிருந்து துண்டித்து வையுங்கள்.

n ஈரப்பதம் உள்ள இடங்களில், மின் இணைப்பிற்காக எக்ஸ்டென்சன் கார்டுகளை உபயோகிப்பதை தவிர்க்க வேண்டும்.

n ஈரப்பதம் உள்ள சுவர்களில் இருக்கும், பிளக் பாயின்டுகளை உபயோகிப்பதை கட்டாயம் தவிர்க்க வேண்டும்.

n ஜன்னல்களுக்கு அருகில் உள்ள பிளக் பாயின்டுகளில், மழை நீர் தெறித்து விடும் அல்லது புகுந்துவிடும் வாய்ப்பு உள்ளதால், மழை நேரங்களில் ஜன்னல்களை மூடி வையுங்கள்.

n மின்சாரப் பழுது ஏற்பட்டால், மின் வாரிய ஊழியர் அல்லது பயிற்சி பெற்ற எலக்ட்ரீசியன் வாயிலாக சரிசெய்யுங்கள். நீங்களே தன்னிச்சையாக சரி செய்ய முயலாதீர்கள்.

-n சுவர்களிலும், மேற்கூரைகளிலும் ஈரப்பதம் இருந்தாலோ அல்லது மழை நீர்க்கசிவு ஏற்பட்டாலோ உடனடியாக சரிசெய்யுங்கள்.

n வெளியிடங்களுக்கு செல்லும்போது, ஈரப்பதம் உள்ள சுவர்கள் மற்றும் மின் கம்பங்களை தொடுவதை தவிர்க்கவும்.

n மழைக்காலங்களில் அல்லது தரையில் ஈரப்பதம் அதிகமாக இருக்கும் சமயங்களில் மின்சாரக் கம்பங்களுக்கு அருகில் செல்வதை தவிர்க்க வேண்டும்.

n பொதுமக்கள் மற்றும் குழந்தைகள் அதிகம் கூடும் பூங்கா போன்ற இடங்களில் உள்ள மின் கம்பங்கள், மின் இணைப்புகள் போன்றவற்றின் அருகில் செல்வதை தவிர்க்க வேண்டும்.

n சாலையோரங்களில் மின் பராமரிப்பு பணிகளோ, சாலைப் பராமரிப்பு பணிகளோ நடைபெற்றால், அப்பகுதிகளில் சில நேரங்களில் மின்கசிவு ஏற்படும் வாய்ப்பு இருக்கும். எனவே, அத்தகைய பகுதிக்கு செல்லும்போது கூடுதல் கவனத்துடன் செல்ல வேண்டும்.

n கட்டடம் இடிந்து விழும் நிலையில் இருந்தாலோ, மரம் விழும் நிலையில் இருந்தாலோ, மரக்கிளைகள் காய்ந்து விழும் நிலையில் இருந்தாலோ, மாநகராட்சி அல்லது கவுன்சிலருக்கு தெரிவித்து, அவற்றை அப்புறப்படுத்த உதவ வேண்டும்.

n மழைபெய்யும் போது, பழுதான கட்டடத்தின் கீழ் அல்லது மரத்தின் அடியில் ஒதுங்க வேண்டாம்.

n மழைக்காலங்களில் வெளியில் செல்லும் போது, வெள்ளம் தேங்கிய பகுதிகளின் நடந்து செல்வதை தவிர்க்க வேண்டும்.

n மழைக்காலங்களில் மின்சார தாக்குதலை தவிர்க்கும் பொருட்டு ரப்பர் காலணிகள், ரப்பர் பூட்ஸ் உபயோகிப்பது நல்லது.

இவ்வாறு, அதில் தெரிவிக்கப்பட்டுள்ளது.