இடையர்பாளையம், அறிஞர் அண்ணா நகரில், கம்பீர சித்தி விநாயகர் கோவில் உள்ளது. இக்கோவிலில், கும்பாபிஷேக விழா நேற்றுமுன்தினம் மங்கள இசையுடன் துவங்கியது. தொடர்ந்து, திருவிளக்கு வழிபாடு, புனிதநீர் வழிபாடு, ஐங்கர பெருமான் வேள்வி, முதல் கால வேள்வி நடந்தது.

நேற்று, அதிகாலை, 4:30 மணிக்கு, திருப்பள்ளி எழுச்சி, மூர்த்திகளுக்கு காப்பணிவித்தல் நடந்தது. தொடர்ந்து, இரண்டாம் கால வேள்வி, 108 வகையான காய், கனி, மூலிகை பொருட்கள் அருள் நிறையேற்றல் நிறையாகுதி, பேரொளி வழிபாடு, மலர் வழிபாடு, திருமுறை இசைத்தல் நடந்தது.

தொடர்ந்து காலை, 6:30 மணிக்கு, சிரவை ஆதினம் குமரகுருபர சுவாமிகள் தலைமையில், மங்கள வாத்தியங்கள் முழங்க, கோவில் விமானத்திற்கு புனித நீர் ஊற்றி கும்பாபிஷேகம், கோலாகலமாக நடந்தது.

தொடர்ந்து கம்பீர சித்தி விநாயகருக்கும், பரிவார மூர்த்திகளுக்கும் மஹா தீபாராதனை நடந்தது. ஏராளமான பக்தர்கள் பங்கேற்றனர்.