சூலுார் அடுத்த கண்ணம்பாளையத்தில் உள்ள ஸ்ரீ மேற்கு மாகாளியம்மன், காமாட்சியம்மன் மற்றும் ஸ்ரீ பாமா ருக்மணி சமேத ஸ்ரீ வேணு கோபால சுவாமி கோவில் பழமையானவை.

இங்கு, திருப்பணிகள் முடிந்து, கும்பாபிஷேக விழா, கடந்த, 30ம் தேதி மாலை 5:30 மணிக்கு, முளைப்பாலிகை ஊர்வலத்துடன் துவங்கியது.

தொடர்ந்து, விநாயகர் பூஜை, திருவிளக்கு பூஜை, நிலத்தேவர் பூஜை நடந்தது.

மகா தீபாராதனை, திவ்ய பிரபந்த விண்ணப்பம், தாசர்கள் கவுரவிப்பு உள்ளிட்டவைகள் நடந்தன. தொடர்ந்து பரத நாட்டியம் நடந்தது.

31ம் தேதி மாலை 5:30 மணிக்கு, முதல் கால ஹோமம் நடந்தது. நேற்று முன்தினம் இரண்டு கால ஹோமம், அஷ்ட பந்தன மருந்து சாத்துதல், சொற்பொழிவு நடந்தது.

நேற்று காலை, நான்காம் கால ஹோமம் முடிந்து, புனித நீர் கலசங்கள் மேள, தாளத்துடன் கோவிலை சுற்றி எடுத்து வரப்பட்டன. 8:00 மணிக்கு, ஸ்ரீமாகாளியம்மன், ஸ்ரீ காமாட்சியம்மனுக்கும், 9:00 மணிக்கு, ஸ்ரீ பாமா, ருக்மணி சமேத ஸ்ரீ வேணு கோபால சுவாமி, ஸ்ரீ ஆஞ்சநேயர் மற்றும் மூல முர்த்திகளுக்கு கும்பாபிஷேகம் நடந்தது.

இதில், சுற்றுவட்டாரத்தை சேர்ந்த ஆயிரக் கணக்கான பக்தர்கள் பங்கேற்று வழிபட்டனர்.