கோவை மாநகராட்சி, வடக்கு மண்டலம், 27வது வார்டு, பாரதி காலனி மூன்றாவது கிராஸ் மனைப்பிரிவு, 1979ல் நகர ஊரமைப்புத் துறையால் அனுமதி பெறப்பட்டது. மொத்தம், 70 சென்ட் பரப்பளவு; 6 மனைப்பிரிவாக பிரிக்கப்பட்டு இருக்கிறது.

பொது ஒதுக்கீடு இடமாக, 7.7 சென்ட் ஒதுக்கப்பட்டு, வரைபட அனுமதி பெறப்பட்டிருக்கிறது. 'ரிசர்வ் சைட்'டில் ஒரு பகுதி, மனை எண்: 7 என குறிப்பிட்டு, 2006ல் கிரையம் செய்யப்பட்டிருக்கிறது. 1.7 சென்ட் பரப்பு ஆக்கிரமிப்பில் சிக்கியிருப்பதை, மாநகராட்சி நகரமைப்பு பிரிவினர் கண்டறிந்தனர்.

வடக்கு மண்டல உதவி நகரமைப்பு அலுவலர் சத்யா, உதவி பொறியாளர் திருமூர்த்தி ஆகியோர் அவ்விடத்துக்குச் சென்று ஆய்வு செய்தனர். ஆவணங்களை சரிபார்த்து, காலியிடமாக இருந்த, 6 சென்ட் 'ரிசர்வ் சைட்'டை உறுதி செய்ததும், மாநகராட்சிக்குச் சொந்தமான இடம் என அறிவிப்பு பலகை நட்டனர்.

18 ஆண்டுகளுக்குப் பின், இவ்விடம் மீட்கப்பட்டிருக்கிறது. ஆக்கிரமிப்பில் உள்ள மீதமுள்ள, 1.7 சென்ட் நிலம் தொடர்பாக கோர்ட்டில் வழக்கு நடந்து வருகிறது; மாநகராட்சிக்குச் சாதகமாக தீர்ப்பு பெறப்பட்டு, மீட்கப்படும், என, நகரமைப்பு பிரிவினர் தெரிவித்தனர்.