தமிழகத்தில், 15 மாவட்டங்களில் வெயிலின் தாக்கம் சதத்தை தாண்டியுள்ளது. மழை பொழிவை கணக்கிட்டு, 'அலர்ட்' சொன்ன காலம் மாறி, வெயிலின் தாக்கம், வெப்ப அலை வீசும் பகுதிகள் குறித்து, 'அலர்ட்' கொடுக்கும் நிலை ஏற்பட்டுள்ளது.

மற்ற ஆண்டுகளை விட தாக்கம் அதிகரித்துள்ளதால், நோய் தாக்குதலில் இருந்து காத்துக்கொள்ள என்ன செய்ய வேண்டுமென, சித்தா டாக்டர் விளக்கமளித்துள்ளார்.

வேட்டைக்காரன்புதுார் அரசு மருத்துவமனை சித்த மருத்துவர் நல்லதம்பி கூறியதாவது:

கடும் வெயிலால் வியர்க்குரு, வேனல் கட்டிகள், அரிப்பு, ஒவ்வாமை போன்ற தோல்நோய்கள், நீர் இழப்பு, ரத்தம் உறைதல் ஏற்படுகிறது.

இதை தவிர்க்க,சீரகம், 10 கிராம் எடுத்து, ஐந்து லிட்டர் நீரில் கொதிக்க வைத்து, ஆற வைத்து வடிகட்டி சுத்தமான மண் பானையில் ஊற்றி, ஈரமான மணல் மீது வைத்து, ஒரு நாளுக்கு ஒருவர் குறைந்தபட்சம், மூன்று லிட்டர் நீராவது பருக வேண்டும். தினமும் தண்ணீரை புதியதாக காய்ச்சி பருக வேண்டும்.

நன்னாரி, விலாமிச்சு வேர், வெட்டி வேர் வகைக்கு ஐந்து கிராம் அளவில் எடுத்து சுத்தமான பருத்தி துணியில் கட்டி, பானை நீருக்குள் போட்டு பருகலாம். தேற்றான் கொட்டையினை உரைத்து குடிநீர் உள்ள பானையிலிட்டு, ஒரு மணி நேரம் கழித்து பார்த்தால், நீரில் உள்ள கசடுகள் பானையின் அடியில் தங்கிவிடும். இதை வடிகட்டி பின் பருகலாம். இதனால், நாவறட்சி, சிறுநீர் பாதை எரிச்சல் நீங்கும்.

நொறுக்கு தீனி, பன்னாட்டு குளிர்பானங்களை தவிர்த்து, நுங்கு, இளநீர், தர்பூசணி, முலாம்பழ ஜூஸ், எலுமிச்சை, விளாம்பழ ஜூஸ், நன்னாரி சர்பத், சுத்தமான பதநீர், ஓ.ஆர்.எஸ்., எனும் உப்பு சர்க்கரை கரைசல் பருகலாம். எலுமிச்சை பழச்சாறில் பானகம் செய்து அருந்தலாம்.

முதல் நாள் சமைத்த சோற்றை மண் சட்டியில் சிறிது கல் உப்பு சேர்த்து சுத்தமான நீர் ஊற்றி மூடிவைத்து, மறு நாள் காலையில் நீராகாரத்தோடு மோர் சேர்த்து அருந்த, உடல் சூடு குறையும்; குடற்புண் குணமாகும்.

மில்லியன் பாக்டீரியாக்கள் உள்ள கருங்குறுவை, கருப்புக்கவுனி அரிசி சோறாக இருந்தால் இன்னும் கூடுதல் சிறப்பு. சர்க்கரை நோயாளிகளுக்கு நல்லது. வெயில் காலங்களில் தோசை, பூரி போன்ற உணவுகள் மற்றும் மலச்சிக்கலை ஏற்படுத்தக்கூடிய உணவுகள், இறைச்சி, அதிக மசாலா சேர்த்த உணவுகளை தவிர்ப்பது நல்லது. மதிய உணவாக, கம்பு, கேழ்வரகு களி, வெண்பூசணி சேர்ந்த நீர் மோர், பச்சடி, கற்றாழை சேர்ந்த மோர் குழம்பு, வேப்பம்பூ ரசம் மிக நல்லது. வேப்பம்பூ பித்தத்தை தணிக்க வல்லது. இரவு ஏழு மணிக்குள் உணவு சாப்பிட வேண்டும்.

வெள்ளரிக்காய், கொய்யா, பேரிச்சம்பழம், செவ்வாழைப்பழம் மற்றும் நார்ச்சத்துள்ள உணவு வகைகளை எடுத்துக்கொள்வது நல்லது. உணவுகள் எளிதில் சீரணிக்க கூடியதாக இருக்கும் படி பார்த்துக்கொள்ள வேண்டும். பரோட்டா, அதிக காரம், மாமிச உணவுகளை தவிர்க்கலாம்.

இவ்வாறு, அவர் கூறினார்.