குன்னத்தூர் புதூரில் பழமையான ஸ்ரீதேவி, பூதேவி, உடன் உறையும் நாராயணமூர்த்தி கோவில் உள்ளது. இக்கோவில் வளாகத்தில், ஆஞ்சநேயர், ராஜ கணபதி, விஷ்ணு மற்றும் துர்க்கை சன்னதிகள் உள்ளன.

இக்கோவிலில் நூறாவது ஆண்டாக இந்த ஆண்டு அன்னதான விழா நடக்கிறது. இன்று காலை 7:00 மணிக்கு மகா சுதர்சன ஹோமம் நடக்கிறது. காலை 10:00 மணிக்கு 100வது ஆண்டை முன்னிட்டு அமைக்கப்பட்ட நினைவு நுழைவு வாயில் திறப்பு விழா நடைபெறுகிறது. இன்று மதியம் அபிஷேக, அலங்கார பூஜை நடக்கிறது. மாலையில் புலவர் கணேசன் பேசுகிறார். இரவு நாட்டிய பள்ளி மாணவியரின் நாட்டியம் நடக்கிறது.

நாளை காலை 8:00 மணிக்கு, 108 தீர்த்த குடங்களால், பூதேவி ஸ்ரீதேவி சமேதர நாராயண மூர்த்திக்கும், ஆஞ்சநேயருக்கும் அபிஷேகம் செய்யப்படுகிறது. காலை 9:00 மணிக்கு குருக்கம்பாளையம் மாகாளியம்மன் குழுவின் பஜனை நடக்கிறது. மதியம் அன்னதானம் வழங்கப்படுகிறது. மாலை 4:00 மணிக்கு சுவாமி திருக்கல்யாண உற்சவம் நடைபெறுகிறது. இரவு நாராயண மூர்த்தி சேஷ வாகனத்தில் உலா வருகிறார். இரவு 9:00 மணிக்கு பஜனை நடக்கிறது.

வரும் 20ம் தேதி காலை 11:00 மணிக்கு மேஜிக் ஷோ நடக்கிறது. மாலையில் விளையாட்டுப் போட்டிகளும், கலை நிகழ்ச்சிகளும் நடைபெறுகிறது. ஏற்பாடுகளை தாசபளஞ்சிக ராமானுஜ பக்தஜன சங்கத்தினர் செய்து வருகின்றனர்.