போதை பொருட்கள் கடத்தல் தடுப்பு சட்டத்தில் பதிவு செய்யப்பட்ட வழக்குகளில், கஞ்சா உள்ளிட்ட போதை பொருட்கள் கைப்பற்றப்பட்டு, கோர்ட்டில் ஒப்படைக்கப்படுகிறது.

வழக்கு முடியும் வரை, போதை பொருட்கள் நீதிமன்ற ஆவண பாதுகாப்பு அறையில் வைக்கப்படுகிறது. தீர்ப்புக்கு பிறகும் கஞ்சாவை அழிக்க போலீசார் முயற்சி எடுப்பதில்லை.

இதனால், 20 ஆண்டுகளுக்கு முன் கைப்பற்றப்பட்ட கஞ்சா மூட்டைகள், நீதிமன்றத்தில் தேங்கின. இதுகுறித்து சென்னை ஐகோர்ட் கவனத்துக்கு கொண்டு செல்லப்பட்டது.

அழித்து விடலாம்

ஐகோர்ட் பிறப்பித்த உத்தரவில், 'போதை பொருள் கடத்தல் வழக்குகளில், மாஜிஸ்திரேட் முன்னிலையில் மாதிரி எடுத்து ஆய்வுக்கு அனுப்பி, முடிவு வந்ததும், அதற்கான ஆவணத்தை கோர்ட்டில் சமர்ப்பிக்க வேண்டும்.

சாட்சி விசாரணையின்போது, ஆய்வு முடிவறிக்கையை சமர்ப்பித்தால் போதும்; போதை பொருளை சமர்ப்பிக்க தேவையில்லை. ஆய்வறிக்கை வந்ததும் போதை பொருளை அழித்து விடலாம்' என உத்தரவிட்டது.

அதைத்தொடர்ந்து, கோவை இன்றியமையா பொருட்கள் தடுப்பு சட்ட நீதிமன்ற(இ.சி., கோர்ட்) ஆவண பாதுகாப்பு அறையில், வைக்கப்பட்டிருந்த கஞ்சா மூட்டைகளை எடுத்துச் சென்று அழிக்க, நீதிபதி உத்தரவிட்டார்.

இதையடுத்து கஞ்சா மூட்டைகள், போதை பொருள் அழிப்பு குழுவிடம் ஒப்படைக்கப்பட்டன. அக்குழுவினர், செட்டிபாளையம் எடுத்துச் சென்று அழித்தனர். எட்டு பைக்குகள், ஏழு நான்கு சக்கர வாகனங்களும், போலீசாரிடம் ஒப்படைக்கப்பட்டன.