கோவைக்கு, வடமாநிலங்களில் இருந்து கஞ்சா, போதைப் பொருட்கள் கடத்தி வருவது குறித்து போலீசார் தீவிர சோதனை நடத்தி வருகின்றனர். இந்நிலையில், தன்பாத் - ஆலப்புழா ரயில், நேற்று கோவை ரயில்வே ஸ்டேஷனை நெருங்கிக் கொண்டிருந்தது. ரயிலின் ஒவ்வொரு பெட்டியிலும், ரயில்வே பாதுகாப்பு படை போலீசார் மற்றும் ரயில்வே போலீசார், பயணிகளின் உடைமைகளை சோதனை செய்தனர்.

பொது பெட்டியில் சோதனை செய்த போது, ஒரு மூட்டை மட்டும் கேட்பாரற்று கிடந்தது. சோதனையிட்டபோது எட்டு கிலோ கஞ்சா இருந்தது.

கஞ்சாவை கேரளாவுக்கு கடத்திச் சென்ற நபர், போலீசார் சோதனை நடத்துவதை அறிந்து, மூட்டையை அப்படியே போட்டு விட்டு, தப்பியது தெரிந்தது. கஞ்சா மூட்டையை பறிமுதல் செய்த போலீசார், தப்பிய நபரை தேடி வருகின்றனர்.