கோவை சந்தைக்கு, கர்நாடகா, தமிழக மாவட்டங்கள், ஓசூர், மைசூர், ஆக்ரா, மகராஷ்டிரா உள்ளிட்ட பல்வேறு பகுதிகளில் இருந்து காய்கறி வரத்து உள்ளன. வழக்கமாக, 1000 டன் காய்கறி வரத்து உள்ள இடத்தில், 400 டன் மட்டுமே வரத்து உள்ளதாக, வியாபாரிகள் கூறுகின்றனர்.

குறிப்பாக, முருங்கை வரத்து குறைந்து ஒரு கிலோ, 430 ரூபாய் வரை நேற்று விற்பனையானது. ஒரு முருங்கை 15 முதல் 20 ரூபாய் வரை, கடைகளில் விற்பனை செய்யப்பட்டது. தியாகி குமரன் மார்க்கெட் மொத்த காய்கறி வியாபாரிகள் சங்கத்தின் தலைவர் ராஜேந்திரன் கூறுகையில், ''வழக்கமாக, நவ., டிச., மாதம் மழைக்காலம் என்பதால், காய்கறி விலை சற்று அதிகரித்து காணப்படுவது வழக்கம்.

''முருங்கை, தக்காளி உற்பத்தி குறைவால், விலை மிகவும் அதிகமாக உள்ளது. பிற காய்கறிகளில் சிறிது விலையேற்றம் உள்ளது. முருங்கை ஒரு கிலோ, 430 ரூபாய் வரை நேற்று விற்பனையானது. மழைக்காலம் முடிந்து புதிய வரத்து துவங்கும் போது விலை சீராகும்,'' என்றார்.