பெரியநாயக்கன்பாளையம் ராமகிருஷ்ண மிஷன் வித்யாலயா முதல் வண்ணான் கோவில் சந்திப்பு வரை, 1.85 கி.மீ., நீளத்துக்கு, 115 கோடி ரூபாய் செலவில் தேசிய நெடுஞ்சாலை துறையால் மேம்பாலம் கட்டி முடிக்கப்பட்டது. பாலம் கடந்த, 2023 டிச., மாதம் பயன்பாட்டுக்கு கொண்டு வரப்பட்டது.

இப்பாலத்தில் மேட்டுப்பாளையம் நோக்கி செல்லும் பாதையில் இறங்குதளமும், சர்வீஸ் ரோடும் ஜீரோ பாயிண்ட்டில் இணையும் இடத்தில் உள்ள, 4 கடைகள் செயல் படுகின்ற நிலத்தை கையகப்படுத்தாமல் மேம்பாலம் அமைத்திருப்பதால், வாகனங்களில் வருவோர் விபத்துகளை சந்திக்கும் நிலை உருவானது.

இப்பிரச்னைக்கு தீர்வு காண, 7.42 கோடி ரூபாய் ஒதுக்கப்பட்டது. ஆனால், பணிகள் துவங்கவில்லை. கோவை கன்ஸ்யூமர் காஸ் செயலாளர் கதிர்மதியோன் மத்திய அரசுக்கு கடிதம் எழுதினார்.

கடிதம் தொடர்பாக மேல் நடவடிக்கை எடுக்க பிரதமர் அலுவலகத்தில் இருந்து தேசிய நெடுஞ்சாலை துறைக்கும், தமிழக அரசுக்கும் உத்தரவிடப்பட்டது.

இதையடுத்து, மேட்டுப்பாளையம் நோக்கி செல்லும் பாதையில் இறங்குதளமும், சர்வீஸ் ரோடும் ஜீரோ பாயின்ட்டில் இணையும் இடத்தில் உள்ள கடைகளை, கையகப்படுத்தும் பணி துவங்கியது. கையகப்படுத்தும் பணியும், ஆக்கிரமிப்புகளை அகற்றும் பணியும் நடந்து வருகின்றன.

கடந்த இரண்டு ஆண்டுகளாக நீடித்து வந்த இப்பிரச்னைக்கு, தற்போது தீர்வு ஏற்பட்டுள்ளது.