கோவை மாவட்டம், பொள்ளாச்சியில் உள்ள பி.ஏ.பி., கண்காணிப்பு பொறியாளர் அலுவலகத்தில், பரம்பிக்குளம் - ஆழியாறு பாசன திட்ட தினம் நேற்று கொண்டாடப்பட்டது. இத்திட்டம் உருவாக காரணமாக இருந்த, மறைந்த முன்னாள் முதல்வர் காமராஜர், முன்னாள் எம்.எல்.ஏ., பழனிச்சாமி, முன்னாள் மத்திய அமைச்சர் சி.சுப்ரமணியம், முன்னாள் எம்.எல்.ஏ., பொள்ளாச்சி மகாலிங்கம், முன்னாள் மத்திய நீர்வளத்துறை அமைச்சர் கே.எல்.ராவ் ஆகியோரின் திருவுருவப்படத்துக்கு மரியாதை செலுத்தும் நிகழ்ச்சி நடந்தது.

அவர்களது உருவப்படங்களுக்கு மலர் துாவி செய்தித்துறை அமைச்சர் சாமிநாதன் மரியாதை செலுத்தினார். மாவட்ட கலெக்டர் கிராந்திகுமார், சப் - கலெக்டர் கேத்ரின் சரண்யா, திருமூர்த்தி நீர்தேக்க திட்டக்குழு தலைவர் பரமசிவம், முன்னாள் எம்.எல்.ஏ., பழனிச்சாமி குடும்ப உறுப்பினர் அருள், முன்னாள் எம்.எல்.ஏ., மகாலிங்கத்தின் மகன் மாணிக்கம், ஆழியாறு நீர் தேக்க திட்டக்குழு தலைவர் செந்தில் மற்றும் விவசாயிகள், நீர்வளத்துறை அதிகாரிகள் மலர் துாவி மரியாதைசெலுத்தினர்.

நிருபர்களிடம் அமைச்சர் கூறியதாவது:

பி.ஏ.பி., திட்டப்பணி துவங்கப்பட்ட நாளான அக்., 7ம் தேதி அரசின் சார்பில், பி.ஏ.பி., பாசன திட்ட தினமாக அறிவிக்கப்பட்டு, ஆண்டுதோறும் கடைபிடிக்கப்படுகிறது. திட்டத்தை உருவாக்கி தந்த மாமனிதர்களுக்கு மரியாதை செலுத்தப்பட்டது.

கண்காணிப்பு பொறியாளர் அலுவலகத்தில், 4.80 கோடி ரூபாய் மதிப்பீட்டில் பிதாமாகன்களுக்கு திருவுருவச்சிலையுடன், அவர்கள் நினைவாக இரண்டு அடுக்குகள் கொண்ட புதிய அரங்குகள் அமைக்கும் பணி நடக்கிறது. பி.ஏ.பி., திட்டப்பணியின் போது, உயிர்நீத்தோருக்கான நினைவு மண்டபம் அமைக்கும் பணி நடக்கிறது.இப்பணிகள் முடிந்ததும், முதல்வரால் திறந்து வைக்கப்படும்.இவ்வாறு, கூறினார்.