விபத்தில் சமையல்காரர் உயிரிழப்பு

பேரூர், முத்துமாரியம்மன் கோவில் வீதியை சேர்ந்தவர் சுந்தரம், 49; சமையல் வேலைக்கு சென்று வந்தார். திருமணமாகி, ராஜேஸ்வரி என்ற மனைவி உள்ளார். 15ம் தேதி, கணவனும், மனைவியும், சமையல் வேலைக்கு சென்று விட்டு இரவு, வீடு திரும்பினர். அதன்பின், சுந்தரம், மது அருந்துவதற்காக, கீழ்ச்சித்திரைச்சாவடி, பேரூர் - வேடபட்டி ரோட்டில் உள்ள டாஸ்மாக் கடைக்கு சென்று விட்டு, மீண்டும் வீட்டிற்கு நடந்து வந்துகொண்டிருந்தார். அவருக்கு பின்னால் அதிவேகமாக வந்த கார், சுந்தரம் மீது மோதிவிட்டு, நிற்காமல் சென்றது. சுந்தரத்திற்கு, தலையில் பலத்த காயம் ஏற்பட்டது. அப்பகுதியை சேர்ந்தவர்கள் சுந்தரத்தை மீட்டு, கோவை அரசு மருத்துவமனையில் அனுமதித்தனர். அங்கு சிகிச்சை பலனின்றி, நேற்று சுந்தரம் உயிரிழந்தார். தொண்டாமுத்துார் போலீசார் வழக்கு பதிந்து, விபத்தை ஏற்படுத்தி நிற்காமல் சென்ற காரை தேடி வருகின்றனர்.