மத்திய அரசானது, மாநிலங்களில் உள்ள நகரங்களில் எந்தளவுக்கு சுத்தம், சுகாதாரம் பராமரிக்கப்படுகிறது என்பதை 'ஸ்வச் சர்வேக் ஷன்' திட்டம் வாயிலாக கடந்த, 2016 முதல் ஆய்வு செய்து வருகிறது. கடந்த, 2024ல் பல்வேறு தர வரிசை அடிப்படையில், 4,900க்கும் அதிகமான நகரங்களில் இந்த ஆய்வு நடந்தது.

இதில், 10 லட்சத்துக்கும் அதிகமான மக்கள் தொகை நகரங்களில், மத்திய பிரதேச மாநிலம், இந்துார் முதலிடத்தை பிடித்துள்ளது. குஜராத் மாநிலம், சூரத், மஹாராஷ்டிராவின் நவி மும்பை, ஆந்திராவின் விஜயவாடா ஆகியன அடுத்தடுத்த இடங்களை பிடித்துள்ளன.

கோவை நகரானது, 28வது இடத்தையும், தமிழகத்தில் முதலிடமும் பிடித்துள்ளது. மொத்தம், 12 ஆயிரத்து, 500 மதிப்பெண்களுக்கு கணக்கிடப்பட்டதில், 8,347 மதிப்பெண்களுடன் கோவை இந்த இடத்தை பிடித்துள்ளது.

கோவை நகரம் குறித்த 'ரிப்போர்ட் கார்டு' குறிப்பில், வீடுகளுக்கு நேரடியாக சென்று குப்பை சேகரிப்புக்கு, 40 சதவீதம், தரம் பிரித்தலுக்கு, 25, கழிவு உருவாக்கம் மற்றும் மேலாண்மைக்கு, 32, பொது கழிப்பிடங்கள் துாய்மைக்கு, 37 சதவீதம் என, மதிப்பெண்கள் வழங்கப்பட்டுள்ளன.

தவிர, குடியிருப்பு, மார்க்கெட் மற்றும் நீர் நிலைகளை துாய்மையாக வைத்திருந்தமைக்கு, 100 சதவீதம் மதிப்பெண்கள் வழங்கப்பட்டுள்ளன. கழிப்பறை இல்லாத வீடுகள் உள்ள பகுதிகளில் பொது கழிப்பறைகளை அதிகரித்தல், தனி நபர் கழிப்பறைக்கு மானியம் உள்ளிட்ட நடவடிக்கைகள் மேற்கொள்ளப்படுகின்றன.

இதன் காரணமாக, பொது வெளியில் மலம் கழித்தல் பெரும்பாலும் தவிர்க்கப்படுவதால், திறந்த வெளியில் மலம் கழித்தல் இல்லாத நகரமாக இந்த முறை கோவை அறிவிக்கப்பட்டு சான்றிதழும் வழங்கப்பட்டுள்ளது.

முன்னேற்றம்தான்!

மாநகராட்சி அதிகாரி ஒருவர் கூறுகையில்,'கடந்த, 2023ல், 35வது இடத்தில் இருந்தோம். குப்பை மேலாண்மைக்கு முக்கியத்துவம் அளித்துவருவதன் வாயிலாக, 28வது இடத்துக்கு தற்போது முன்னேறியுள்ளோம்.

'இந்த முறை, பொது வெளியில் மலம் கழித்தல் இல்லாத(ஓ.டி.எப்.,) நகரமாகவும் சான்றிதழ் பெற்றுள்ளது கூடுதல் அம்சம்' என்றார்.