வழக்கமாக, மார்ச் மாதம் துவங்கி ஆக., மாதம் வரை நீடிக்கும் தேங்காய் சீசனில், 40 சதவீதம் மட்டுமே தேங்காய் வரத்து இருந்தது. இதனால், தேங்காய், கொப்பரைக்கு தட்டுப்பாடு ஏற்பட்டு, தேங்காய் சார்ந்த அனைத்து பொருட்களின் விலையும் உயர்ந்துள்ளது.

இந்நிலையில், விவசாயிகள் உற்பத்தி செய்யும் கொப்பரையை ஒழுங்குமுறை விற்பனைக்கூடங்களில், 'இ-நாம்' முறையில் விற்பனை செய்கின்றனர்.

கிணத்துக்கடவு, ஒழுங்குமுறை விற்பனை கூடத்தில், கடந்த ஏப்ரல் மாதம் முதல் ஜூலை மாதம் வரையான, 4 மாதங்களில் 203 மெட்ரிக் டன் அளவு கொப்பரை, 20 லட்சம் ரூபாய்க்கு விற்பனை ஆகியுள்ளது. இதனால் உள்ளூர் மற்றும் வெளியூர் வியாபாரிகள் என, 150 விவசாயிகள் பயனடைந்துள்ளனர்.

ஒரு கிலோ முதல் தர கொப்பரை 220 முதல் 235 ரூபாய்க்கும், இரண்டாம் தர கொப்பரை 100 முதல் 180 ரூபாய்க்கும் விற்பனை ஆனது. இத்தகவலை விற்பனை கூட கண்காணிப்பாளர் செல்வராஜ் தெரிவித்தார்.