முருகனின் ஏழாம் படை வீடாக மருதமலை சுப்பிரமணிய சுவாமி கோவில் கருதப்படுகிறது. இக்கோவிலில், கடந்த, 19ம் தேதி, கொடியேற்றத்துடன் தைப்பூச தேர்த்திருவிழா துவங்கியது. தைப்பூச தேர்த்திருவிழாவின் மூன்றாம் நாளான நேற்று, அதிகாலை, 5:30 மணிக்கு கோ பூஜையும், 5:30 மணிக்கு நடை திறக்கப்பட்டு சுப்பிரமணியசுவாமிக்கு சிறப்பு அபிஷேகமும் நடந்தது. சுப்பிரமணிய சுவாமி, தங்க கவசத்தில் பக்தர்களுக்கு காட்சியளித்தார்.

தொடர்ந்து, வள்ளி, தெய்வானை சமேத சுப்பிரமணிய சுவாமி, காலை, 8:00 மணிக்கு, பத்மாசனத்திலும், காலை, 11:00 மணிக்கு, கேடயத்திலும், மாலை, 5:00 மணிக்கு, ஆட்டுக்கிடாய் வாகனத்திலும் திருவீதி உலா வந்து பக்தர்களுக்கு அருள்பாலித்தனர். நேற்று, அதிகாலை முதலே, ஏராளமான பக்தர்கள், பால்குடம் எடுத்தும், காவடி எடுத்தும், பாதயாத்திரையாகவும் வந்து, சுவாமியை தரிசித்து சென்றனர்.