கோவை - அவிநாசி சாலை, உப்பிலிபாளையத்திலிருந்து சின்னியம்பாளையம் வரை, 10.1 கி.மீ., தொலைவிற்கு 1,621.30 கோடி ரூபாயில், மாநில நெடுஞ்சாலைத் துறையால் மேம்பாலம் கட்டப்பட்டு வருகிறது. 2020ம் ஆண்டு டிச.,ல் கட்டுமான பணி துவங்கியது.

மேம்பாலம், 17.25 மீட்டர் அகலத்தில், நான்கு வழிச்சாலையாக அமைக்கப்படுகிறது. 10.5 மீட்டர் அகலத்தில் சாலையின் இரு பக்கங்களிலும், சர்வீஸ் சாலைகளும், ஒன்றரை மீட்டர் அகலத்தில் மழை நீர் வடிகால் மற்றும் நடைபாதையும் அமைக்கப்பட்டு வருகிறது.

ஜூலை 30 இலக்கு

கட்டுமான பணிகள், 95 சதவீதம் நிறைவடைந்துள்ள நிலையில், ஜூலை, 30க்குள் பணிகள் முழுமையாக நிறைவடையும் என தெரிவிக்கப்பட்டிருந்தது.

ஹோப்ஸ் பகுதியில் உள்ள ரயில்வே பாலத்தை கடக்கும் பணிகள் மீதம் உள்ளன.

அப்பகுதியில் ரயில்வே பாலம் உள்ளதால், துாண்கள் நிறுவ முடியாது. இதனால், அந்த 52 மீ., இடைவெளியை எட்டு கர்டர்கள் கொண்டு, பாலம் பொருத்த திட்டமிடப்பட்டுள்ளது.

ரயில்வே தண்டவாளம் இருப்பதால், ரயில் போக்குவரத்துக்கு இடையூறு ஏற்படாத வகையில், மேம்பால பணிகளை மேற்கொள்ள, நெடுஞ்சாலைத்துறை அதிகாரிகள், ரயில்வே அதிகாரிகளுடன் ஆலோசனை நடத்தினர்.

சந்தேகம்தான்

அப்பகுதியில் பாலம் வேலை துவங்கப்பட்டால், போக்குவரத்து மாற்றம் செய்ய வேண்டும். இந்நிலையில் ஏழு நாட்களுக்கு தினசரி காலை, 9:00 முதல் 11:00 மணி வரை மேம்பாலம் பணிகளை மேற்கொள்ள அனுமதி அளிப்பதாக, ரயில்வே அதிகாரிகள் தெரிவித்துள்ளனர்.

ஆனால், கல்லுாரிகள், ஐ.டி.,நிறுவனங்கள் என மிகவும் பிசியாக இருக்கும் ஹோப்ஸ் பகுதியில், 'பீக் ஹவர்ஸ்'ல் போக்குவரத்து மாற்றம் செய்வது சவாலானது.

அதனால் ஜூலையில் மேம்பாலம் திறக்கப்பட்டு, பயன்பாட்டுக்கு வருவது சந்தேகமாகவே உள்ளது.