கோவை, சுகுணாபுரத்திலுள்ள கிருஷ்ணா கல்லூரி அரங்கில், முன்னாள் கல்லூரி கல்வி இயக்குனர் குமாரசாமி தலைமையில் விழா நடந்தது. திருக்குறள் ஆய்வு கழக தலைவர் அன்வர் பாட்சா வரவேற்றார். எய்ம் அறக்கட்டளை அறங்காவலர் நாகராஜ் துவக்கவுரையாற்றினார்.

'சுற்றுச்சூழல் பாதுகாப்பில் பாரம்பரிய முறைகளும், நவீன திட்டங்களும்' எனும் தலைப்பில், அறிவுரையாளர் லட்சுமண பெருமாள்சாமி பேசுகையில், ''நீர், நிலம், காற்று, நெருப்பு உள்ளிட்ட பஞ்ச பூதங்களும் மாசடைந்துள்ளன.

பருவநிலை மாற்றத்தால் அனைவரும் பாதிக்கப்பட்டுள்ளோம். மின் வாகன பயன்பாடு, காற்றாலை, சூரிய மின் சக்தி ஆகியவற்றை பயன்படுத்துவதன் மூலம் இம்மாசினை குறைக்கலாம்,'' என்றார். 'நீர் வளங்கள் பாதுகாப்பில் பாரம்பரிய முறைகளும் நவீன திட்டங்களும்' எனும் தலைப்பில், தமிழ்நாடு நீராதார வளர்ச்சி குழும முன்னாள் தலைமை இன்ஜினியர் இளங்கோவன் பேசுகையில், ''ஒவ்வொரு குடும்பமும் ஒவ்வொரு ஆண்டும் தலா, 10 மரக்கன்றுகளை நட, உறுதி எடுக்க வேண்டும். பிள்ளைகள் மொபைல் போன் பயன்படுத்த விடக்கூடாது,'' என்றார்.

போட்டிகளில் வென்ற மாணவ மாணவியருக்கு, கமிஷனர் சிவகுரு பிரபாகரன் பரிசு, சான்றிதழ் வழங்கினார்.

இண்டேன் ஆயில், வி.ஆர்.வாட்டர் இன்ப்ரா நிறுவனம், ஸ்ரீ கிருஷ்ணா கல்வி குழுமம், ஜெ.ஆர். பில்டர்ஸ், ஸ்ரீ கலைவாணி கல்வியியல் கல்லூரி ஆகியவை, நிகழ்ச்சியை இணைந்து நடத்தின.

பொன்னாடை போர்த்தி பாராட்டு

மாவட்டத்தில் சிறப்பாக தமிழ் பணியாற்றும் உலக தமிழ்நெறி கழகத்தின் சிவலிங்கம், தொல்காப்பியர் தமிழ் சங்கத்தின் காளியப்பன், கவையன்புத்தூர் தமிழ் சங்கத்தின் கணேசன், கம்பன் கலை கூடத்தின் டாக்டர் சுப்ரமணியம், வசந்த வாசல் கவி மன்றத்தின் சண்முகம், கோவை முத்தமிழ் அரங்கின் சுப்பையா, அறம் அறிவு பட்டறையின் சாந்தலிங்கம், கனவு மெய்ப்பட படைப்பகத்தின் பிரபா, தமிழ் சங்கமம் காப்பு கூட்டியக்கத்தின் துரைசாமி, எய்ம் அறக்கட்டளையின் திருநாவுக்கரசு மற்றும் திருக்குறள் ஆய்வு கழகத்தின் அன்வர் பாட்சா ஆகியோருக்கு பொன்னாடை போர்த்தி, நினைவு பரிசு வழங்கப்பட்டது.

மாநகராட்சியில் சிறப்பாக தூய்மை பணி மேற்கொள்ளும், பத்து பேருக்கும் பரிசு வழங்கப்பட்டது.