தமிழ்நாடு விவசாயிகள் சங்கம் சார்பில், கூட்டுறவுத் துறை முதன்மை செயலரிடம் அளித்த மனு:

கோவை மாவட்டத்தில், கூட்டுறவு வங்கிகளில் விவசாயிகள், முதல்வர் ஆணையால் வழங்கப்பட்டு வந்த பயிர்க் கடன் தொகை, 1.60 லட்சம் ரூபாயில் இருந்து 2 லட்சமாக உயர்த்தி வழங்கியதால், விவசாயிகள் கடன் பெற்று விவசாயம் செய்து வந்தனர்.

தற்போது கூட்டுறவு சங்க ஆணையர் சுற்றறிக்கையில், 'சிபில் ஸ்கோர் பார்த்து, கூட்டுறவு வங்கியில் கடன் பெற வேண்டும்' என்ற நிபந்தனை கூறப்பட்டுள்ளது. இதனால், விவசாயிகள் தினமும் கூட்டுறவு வங்கிகளுக்கும், நிலவள வங்கி மற்றும் மத்திய கூட்டுறவு வங்கிகளுக்கும் அலைய வேண்டிய சூழல் இருக்கிறது.

அதிகபட்சமாக ஒரு விவசாயிக்கு, வழங்கப்படும் தொகை இரண்டு லட்சம் ரூபாய் என கணக்கிட்டால், வாழை மற்றும் மஞ்சள் பயிர் செய்த விவசாயிகளுக்கு, இரண்டு ஏக்கருக்கு மட்டுமே உற்பத்தி செலவுக்கு போதும். மீதி தொகையை பெற மற்ற வங்கிகளை நாட வேண்டிய சூழல் இருக்கிறது.

பொருளீட்டு கடனாக நகை வைத்து, பயிர்க்கடன் பெறும் போதும், வட்டியில்லா கடன் பெற்றிருந்தால், பயிர்க்கடன் வழங்க இயலாது என, கூட்டுறவு சங்க செயலாளர்கள் தெரிவிக்கின்றனர்.

இவ்வாறான அறிவிப்பு, விவசாயிகள் மத்தியில் ஏமாற்றத்தையும், மன உளைச்சலையும் ஏற்படுத்துகிறது. எனவே, ஏற்கனவே நடைமுறையில் இருந்து வந்த, ஒரு விவசாயிக்கு அதிகபட்சமாக 2 லட்சம் ரூபாய் வரை, வட்டியில்லா கடன் கொடுக்கும் நிலையை, எவ்வித நிபந்தனைக்கும் உட்படுத்தப்படாமல் மீண்டும் தொடரச் செய்ய வேண்டும்.

இவ்வாறு, அதில் கூறப்பட்டுள்ளது.