விபத்துக்கள் அதிகரிக்க, போக்குவரத்து விதிமீறல்களும் முக்கிய காரணம். இதைத்தடுக்க, போக்குவரத்து விதிமீறல்களுக்கான அபராதத்தை அரசு உயர்த்தியது.

சிக்னல்களில் அமைக்கப்பட்டுள்ள கேமராக்கள் மற்றும் போலீசார் தங்கள் போனில் எடுக்கும் படம் மூலம், அபராதம் விதிக்கும் நடைமுறைகள் உள்ளன.

மது குடித்து விட்டு வாகனம் ஓட்டுபவர்களுக்கு, ரூ.10 ஆயிரம் அபராதம் விதிக்கப்படுகிறது. இதை செலுத்த போலீசார் கால அவகாசம் வழங்குகின்றனர். இதை பயன்படுத்திக் கொள்ளும் வாகன ஓட்டிகள், அபராதம் செலுத்தாமல் சென்று விடுகின்றனர்.

மது குடித்து விட்டு வாகனம் ஓட்டியதற்காக, கடந்த செப்., 25ம் தேதி வரை, ரூ.47.83 கோடி அபராதம் விதிக்கப்பட்டுள்ளது. இதில், 20 சதவீதம் அதாவது, ரூ.9.28 கோடி மட்டுமே வசூலாகியுள்ளது. மீதமுள்ள ரூ.38.54 கோடியை வசூலிக்கும் முயற்சியில், போலீசார் இறங்கியுள்ளனர்.

போலீஸ் அலுவலர் ஒருவர் கூறுகையில், 'அபராதத்தை நடமாடும் நீதிமன்றம், இ-சலான் மூலம் செலுத்த வழிவகை செய்யப்பட்டுள்ளது.

அபராதம் செலுத்தாத வாகன ஓட்டியின் குடியிருப்புக்கு அருகில் உள்ள போலீஸ் ஸ்டேஷனில் இருந்து, அழைத்து தகவல் தெரிவிக்கப்படும்.

அதன் பின்னரும் பலர் செலுத்தாமல் உள்ளனர். அபராதத்தை வசூலிக்க, வாகனங்களை பறிமுதல் செய்யவும் திட்டமிடப்பட்டுள்ளது. வாகனத் தணிக்கையின் போது, இந்த திட்டத்தை நடைமுறைப்படுத்த அறிவுறுத்தப்பட்டுள்ளது' என்றார்.