கோவை, கவுண்டம்பாளையம் வீட்டு வசதி வாரிய குடியிருப்பில், 13 வீடுகளில், 42 சவரன் தங்க நகைகள், 1.5 லட்சம் ரூபாய், வெள்ளி பொருட்கள் திருடு போயின.

தனிப்படை போலீசார் வடமாநிலத்தை சேர்ந்த இர்பான், 48, கல்லு ஆரிப், 60, காசிப்பூரை சேர்ந்த ஆஷிக், 45, ஆகியோரை நேற்று முன்தினம் சுட்டு பிடித்தனர்.

மூவருக்கும் அரசு மருத்துவமனையில் சிகிச்சை அளிக்கப்பட்டு வந்த நிலையில், ஆஷிக் நேற்று காலை திடீரென உயிரிழந்தார். போலீசார் சுட்டதால், வலது காலில் காயம் ஏற்பட்டு, அதற்காக சிகிச்சை பெற்று வந்த அவர், உடல்நிலை மோசமாகி உயிரிழந்தார். இதுகுறித்து விசாரணை நடக்கிறது.

கோவை அரசு மருத்துவமனை முன்னாள் இதயவியல் துறை நிபுணர் டாக்டர் கணேசன் கூறுகையில், ''காலில் சுட்டதால் பிரதான நரம்பில் காயம் ஏற்பட்டு, அதனால் ரத்தம் உறைந்து விடும். இது மூளையில் பாதிப்பை ஏற்படுத்தி, உயிரிழப்பு ஏற்படலாம். அதேபோல், பிரதான நரம்பில் காயம் ஏற்பட்டு ரத்தப்போக்கு ஏற்பட்டால், இதய ரத்த ஓட்டம் பாதித்து, 'ஷாக்' ஏற்பட்டும் உயிரிழப்பு ஏற்படலாம்,'' என்றார்.

இதற்கிடையே, கொள்ளையில் ஈடுபட்ட மூவரும், குனியமுத்துார் பி.கே.புதுார் குளத்துபாளையம் திருநகர் பகுதியில் உள்ள ஒரு வீட்டில் உ.பி.,யை சேர்ந்த, 12 பேருடன் தங்கியிருந்தனர்.

இவர்களில் பெரோஸ், 45, பர்மான், 42, ஆகிய இருவரே, இர்பான், கல்லு ஆரிப், ஆஷிக் ஆகிய மூவரையும் கொள்ளையடிக்க கோவை வரவழைத்தது தெரிந்தது. நேற்று பெரோஸ் உள்ளிட்ட இருவரும் கைது செய்யப்பட்டனர்.