கோவை, கவுண்டம்பாளையம் வீட்டு வசதி வாரியக் குடியிருப்பில், 13 வீடுகளில் 42 பவுன் தங்க நகைகள், ரூ.1.50 லட்சம், வெள்ளிப் பொருட்கள் திருட்டு போனது.

கண்காணிப்பு கேமரா காட்சிகளின் உதவியுடன், தனிப்படை போலீசார் விசாரணை நடத்தி, பதுங்கியிருந்த வடமாநிலங்களை சேர்ந்த இர்பான், 48, கல்லு ஆரிப், 60, காசிப்பூரை சேர்ந்த ஆஷிக், 45 ஆகியோரை சுட்டுப்பிடித்தனர்.

மூவருக்கும் அரசு மருத்துவமனையில் சிகிச்சை அளிக்கப்பட்டு வந்தது. இந்நிலையில் அவசர சிகிச்சை பிரிவில் அனுமதிக்கப்பட்டிருந்த ஆஷிக், நேற்று காலை திடீரென உயிரிழந்தார். இதுகுறித்து விசாரணை நடக்கிறது.

கொள்ளையில் ஈடுபட்டவர்கள், மூவரும் குனியமுத்துார் பி.கே.புதுார் குளத்துபாளையம் திருநகர் பகுதியில் உள்ள ஒரு வீட்டில் உ.பி.,யை சேர்ந்த, 12 பேருடன் தங்கியிருந்தனர். இவர்களில் பெரோஸ், 45, பர்மான், 42 ஆகிய இருவரே, இர்பான், கல்லு ஆரிப், ஆஷிக் ஆகிய மூவரையும் கொள்ளையடிக்க கோவை வரவழைத்தது தெரிந்தது. இருவரும் கைது செய்யப்பட்டனர். அவர்களிடம் விசாரணை நடக்கிறது.