மேட்டுப்பாளையம் நெல்லித்துறை சாலையில், நீலகிரி கூட்டுறவு விற்பனைச் சங்கம், செயல்பட்டு வருகிறது. இங்கு, ஊட்டி, குன்னுார், கோத்தகிரி, கேத்தி, கூடலுார் என பல்வேறு இடங்களில் உற்பத்தி செய்யப்படும் உருளைக்கிழங்குகள் ஏலம் விடப்படுகிறது. விளைச்சல் அதிகரிப்பால், ஊட்டி கிழங்குகளின் வரத்து அதிகரித்துள்ளதால், விலை குறைந்து விற்பனையாகி வருகிறது.

இதுகுறித்து, நீலகிரி கூட்டுறவு விற்பனைச் சங்கத்தினர் கூறுகையில், ''45 கிலோ எடை கொண்ட ஒரு மூட்டை ஊட்டி உருளைக்கிழங்குகள் அதிகபட்சமாக நேற்று ரூ.1,800க்கு விற்பனை ஆனது.

சுமார் 3,200 மூட்டைகள் வந்தன, வரத்து அதிகரிப்பால் விலை குறைந்தன. நேற்று முன் தினம் மூட்டை ஒன்று ரூ.2,050க்கு விற்பனை ஆனது குறிப்பிடத்தக்கது,'' என்றனர்.-