தொண்டாமுத்தூர் வட்டாரத்தில் விவசாயம் பிரதான தொழிலாக உள்ளது. இந்நிலையில், தொண்டாமுத்தூர், பேரூர், ஆலாந்துறை, காருண்யா நகர் உள்ளிட்ட போலீஸ் ஸ்டேஷன் எல்லைக்குட்பட்ட பகுதிகளில், சில தோட்டங்களில், தமிழக அரசால் தடை செய்யப்பட்ட தென்னை மரங்களில், 'கள்' இறக்கி வருகின்றனர்.

காலை, 6:00 மணி முதலே, மறைமுகமாக 'கள்' விற்பனையும் ஜோராக நடந்து வருகிறது. தொண்டாமுத்தூர் வட்டாரப்பகுதியில், சில கிராமங்களில் இருந்து டாஸ்மாக் மதுக்கடைக்கு, 10 கி.மீ., தொலைவு செல்ல வேண்டியுள்ளது.

அதோடு, டாஸ்மாக் கடை, பகல், 12:00 மணிக்கே திறக்கப்படும். அதற்கும், பார்களில், 'சில்லிங்' விற்பனையில், அதிக விலைக்கு மது விற்பனை செய்வதாலும், அதிகாலை, 'கள்' குடிக்க பலரும் செல்கின்றனர்.

தொண்டாமுத்தூர் வட்டாரத்தில், ஒரு லிட்டர் கள், 120 ரூபாய்க்கு விற்பனை செய்து வருகின்றனர். ஆனால், போலீசாரும் இதனை கண்டுகொள்வதில்லை.