தமிழ்நாடு மற்றும் புதுச்சேரிக்கான இண்டர் பாலிடெக்னிக் அதலெடிக் அசோசியேஷன் (ஐ.பி.ஏ.ஏ.,) சார்பில் பாலிடெக்னிக் மாணவர்களுக்கு மண்டல அளவிலான கூடைப்பந்து, டேபிள் டென்னிஸ் மற்றும் இறகுப்பந்து போட்டி பி.எஸ்.ஜி., பாலிடெக்னிக் கல்லுாரி சார்பில் நடந்தது.

போட்டியை, பி.எஸ்.ஜி., பாலிடெக்னிக் கல்லுாரி முதல்வர் கிரிராஜ் துவக்கி வைத்தார். இதன் கூடைப்பந்து மற்றும் இறகுப்பந்து போட்டிகளில் தலா எட்டு அணிகளும், டேபிள் டென்னிஸ் போட்டியில் ஏழு அணிகளும் பங்கேற்றன.

கூடைப்பந்து இறுதிப்போட்டியில், பி.எஸ்.ஜி., பாலிடெக்னிக் கல்லுாரி அணி 34 - 20 என்ற புள்ளிக்கணக்கில் நாச்சிமுத்து பாலிடெக்னிக் கல்லுாரியை வீழ்த்தியது.

டேபிள் டென்னிஸ் இறுதிப்போட்டியில், பி.எஸ்.ஜி., அணி 3 - 0 என்ற செட் கணக்கில் எஸ்.ஆர்.எம்.வி., பாலிடெக்னிக் கல்லுாரியை வீழ்த்தியது.

இதேபோல், இறகுப்பந்து இறுதிப்போட்டியில் நாச்சிமுத்து பாலிடெக்னிக் கல்லுாரி அணி 2 - 0 என்ற நேர் செட் கணக்கில், பி.எஸ்.ஜி., கல்லுாரி அணியை வீழ்த்தி முதலிடம் பிடித்தது.

வெற்றி பெற்ற மாணவர்களுக்கு, பி.எஸ்.ஜி., டெக் கல்லுாரியின் கணினி அறிவியல் துறை பேராசிரியர் அருள்ஆனந்த் பரிசுகளை வழங்கினார்.