கோவை மாநகராட்சி, கிழக்கு மண்டலம் ஏழாவது வார்டு, இந்திரா நகரில், நகர ஊரமைப்பு துறையில் அனுமதிபெறப்பட்டு, 1983ல், 3.22 ஏக்கருக்கு லே-அவுட் உருவாக்கப்பட்டது; மொத்தம், 31 மனைகள் உள்ளன. பொது ஒதுக்கீடாக, குழந்தைகள் விளையாடும் இடமாக, 25 சென்ட், கடைக்காக, 4 சென்ட் ஒதுக்கப்பட்டது.

குழந்தைகள் விளையாடுவதற்காக ஒதுக்கப்பட்ட, மாநகராட்சிக்குச் சொந்தமான இடத்தை, 2023 ஆக., மாதம், ஒரு கோடியே, 17 லட்சம் ரூபாய்க்கு காந்திபுரம் சார்பதிவாளர் அலுவலகத்தில் கிரையம் (பத்திரம் எண்: 8234/ 2023) செய்திருக்கின்றனர். அவ்விடத்தை சுற்றிலும் சுவர் எழுப்பி, கேட் போடப்பட்டுள்ளது.

அங்கு, 20 சென்ட் இடத்தில், 8,000 சதுரடிக்கு ஒர்க் ஷாப் நடத்தப்பட்டு உள்ளது. அதற்கு மாநகராட்சியில் இருந்து சொத்து வரி போடப்பட்டு, குடிநீர் இணைப்பும், பட்டாவும் வழங்கப்பட்டுள்ளது. அவ்விடத்தின் தற்போதைய சந்தை மதிப்பு, ஐந்து கோடி ரூபாய் இருக்குமென மதிப்பிடப்பட்டிருக்கிறது. இதேலே-அவுட்டில், மற்றொரு 'ரிசர்வ் சைட்' இடமான 7 சென்ட் இடமத்தில் ஷெட் அமைத்து ஆக்கிரமித்துள்ளனர். இதன் மதிப்பு ஒரு கோடி ரூபாய் இருக்கும். இந்த 'ரிசர்வ் சைட்'டையும் மீட்க, மாநகராட்சி நகரமைப்பு பிரிவு,எவ்வித நடவடிக்கையும் எடுக்கவில்லை.

குழந்தைகள் விளையாடும் இடத்தை ஆக்கிரமித்தவர்களால்,சென்னை ஐகோர்ட்டில் தொடரப்பட்ட வழக்கு, கடந்த ஏப்., மாதம் தள்ளுபடி செய்யப்பட்டு, மாநகராட்சிக்கு சாதகமாக தீர்ப்பு வழங்கப்பட்டுள்ளது. அவ்விடத்தை மீட்டு, ஆக்கிரமிப்பு கட்டடங்களைஇடித்து அகற்றி விட்டு, குழந்தைகள் விளையாடும் இடமாக மாற்றிக் கொடுக்க வேண்டும். அவ்வாறு செய்யாமல், அக்கட்டடங்களில்'கோச்சிங் சென்டர்' அமைப்பதற்கான பணிகள் நடந்து வருகின்றன.