ராமலிங்கம் செட்டியார் பள்ளி சார்பில், 27ம் ஆண்டு 'ராமலிங்கம் செட்டியார் நினைவு கோப்பைக்கான' மாவட்ட அளவிலான கிரிக்கெட் போட்டி, கோவையில் நடக்கிறது. இதில், 16 பள்ளி அணிகள் பங்கேற்றுள்ளன. இதன் காலிறுதிப்போட்டியில் ஆர்.கே. ஸ்ரீ ரங்கம்மாள் கல்வி நிலையம் மேல்நிலைப்பள்ளி மற்றும் ஸ்ரீ ராமகிருஷ்ணா மெட்ரிக்., மேல்நிலைப்பள்ளி அணிகள் மோதின.

முதலில் பேட்டிங் செய்த ஆர்.கே.எஸ்., பள்ளி அணி, 20 ஓவர்களில் ஆறு விக்கெட் இழப்புக்கு 98 ரன்கள் சேர்த்தது. அணியின் கேப்டன் முகமது அபசன் (31) பொறுப்பாக விளையாடினார். அடுத்து விளையாடிய ராமகிருஷ்ணா அணி பிரசன்னாவின் (65*) அதிரடி ஆட்டத்தால், 11.1 ஓவர்களில் ஒரு விக்கெட் மட்டும் இழந்து, 100 ரன்கள் எடுத்து வெற்றி பெற்றது.