கோவையில், இந்திய வேளாண் ஆராய்ச்சிக் கழகத்தின் ஓர் அங்கமான, கரும்பு இனப்பெருக்கு நிறுவனம் செயல்பட்டு வருகிறது. கரும்பு ஆராய்ச்சியில் இந்தியாவின் முன்னோடி நிறுவனமான இதன் ஆய்வில் உருவாக்கப்பட்ட கரும்பு ரகங்கள், இந்தியாவில் 80 சதவீத பரப்பில் பயிரிடப்படுகின்றன.

கரும்பு இனப் பெருக்கு நிறுவனத்தில், சுகர்கேன்எட்ஜ் என்ற பெயரில், கரும்பு வேளாண் வணிகக் காப்பகம் செயல்பட் டு வருகிறது.

இம்மையம், கரும்பு சாகுபடி மற்றும் இனிப்பு சார்ந்த புதிய உணவுப் பொருட்களை வணிகமயமாக்குவதை ஊக்குவித்து வருகிறது.

கரும்பு இனப்பெருக்கு நிறுவனம், 23க்கும் மேற்பட்ட கரும்பு சார் தொழில்நுட்பங்களை வெற்றிகரமாக வணிகமயமாக்கியுள்ளது.

விவசாயிகள், தொழில்முனைவோர், உணவு பதப்படுத்தும் துறையினர், மதிப்புக்கூட்டல் மேலாண்மைக்கான வழிகாட்டுதலை வணிகக் காப்பகம் வாயிலாக பெற்றுக் கொள்ளலாம்.

வணிகக் காப்பகம் வழங்கி வரும் சேவைகளை, உறுப்பினர்களாகப்பதிவு செய்வதன் வாயிலாக பெற இயலும்

கரும்பு இனப்பெருக்க நிறுவன தொழில்நுட்பங்களை வணிகமயமாக்கல், தொழில்முனைவோருக்கான சந்தை இணைப்பு வாய்ப்புகள், காப்புரிமை தாக்கல் செய்ய உதவி, தனியார் விதைத்துறை கூட்டமைப்பு அமைக்க உதவி, உணவு பதப்படுத்தும் முயற்சிகள், தொழில்நுட்ப பரிமாற்றம் உள்ளிட்ட சேவைகளைப் பெறலாம்.

கரணை நேர்த்திக்கருவி, ஆற்றல் கரும்பு, கரும்பு நடவு இயந்திரம், கரும்பு ஜாம் தொழில்நுட்பம், கரும்பு தோல் அகற்றும் கருவி, திரவ வெல்லம் தயாரிக்கும் தொழில்நுட்பம், கரும்பில் தோகை உரிக்கும் உபகரணம், ஆழச்சால் கரும்பு வெட்டும் நடவு இயந்திரம், மண் ஈரப்பதங்காட்டி போன்ற 23 வகையான தொழில்நுட்பங்களை பெற்று பயனடையலாம் என, சுகர்கேன்எட்ஜ் வணிக காப்பகம் அழைப்பு விடுத்துள்ளது.