கடலுார் அடுத்த காராமணிக்குப்பம், ராஜாராம் நகரை சேர்ந்தவர் சுகந்தகுமார், தாய் கமலீஸ்வரி, மகன் இசாந்த் ஆகியோர் கடந்த ஜூன் 15ம் தேதி கொலை செய்து எரிக்கப்பட்டிருந்தனர்.

இதுகுறித்து நெல்லிக்குப்பம் போலீசார் வழக்கு பதிந்து, அதேபகுதியை சேர்ந்த சங்கர் ஆனந்த்,21; மற்றும் அவரது நண்பரான நெல்லிக்குப்பம் சாகுல்அமீது,20; ஆகியோரை கைது செய்து கோர்ட்டில் ஆஜர்படுத்தி சிறையில் அடைத்தனர்.

இந்நிலையில் இவ்வழக்கில் வேறு யாருக்கேனும் தொடர்பு உள்ளதா என்பது குறித்து, இருவரையும் விசாரிக்க அனுமதி கோரி நெல்லிக்குப்பம் போலீசார் கோர்ட்டில் மனு தாக்கல் செய்தனர்.

இம்மனுவை விசாரித்த மாஜிஸ்திரேட் வனஜா, இருவரையும் 2 நாள் காவலில் வைத்து விசாரிக்க ் அனுமதி வழங்கினார்.

அதனையொட்டி, கடலுார் மத்திய சிறையில் அடைக்கப்பட்டிருந்த சங்கர் ஆனந்த் மற்றும் சாகுல் அமீது ஆகியோரை நேற்று ஏ.டி.எஸ்.பி., பிரபாகரன் தலைமையிலான குழுவினர் காவலில் எடுத்து விசாரித்து வருகின்றனர்.