நெய்வேலி நகரில் அதிகரித்து வரும் குற்றச் செயலை தடுக்கும் பொருட்டு எஸ்.பி., ராஜாராம் உத்தரவின் பேரில் டி.எஸ்.பி., சபியுல்லா தலைமையில், டவுன்ஷிப் இன்ஸ்பெக்டர் சுதாகர் மற்றும் போலீசார் நேற்று ரோந்து சென்றனர்.

அப்போது, வட்டம் 5 அருகே முனீஸ்வரன் கோவில் செல்லும் சாலையில் முகமூடி அணிந்து பதுங்கியிருந்த மூவரை மடக்கி பிடித்ததில் அவர்கள் வீச்சரிவாள், இரும்பு ராடு மற்றும் மிளகாய் துாள் வைத்திருந்ததை கண்டுபிடித்து பறிமுதல் செய்தனர்.

விசாரணையில் நெய்வேலி வட்டம் 1 சிலோன் குடியிருப்பை சேர்ந்த உசேன் மகன் அப்புக்குட்டி (எ) முகமது ரபிக்,22; ராஜ் மகன் சதீஷ்குமார்,26; சின்னையன் மகன் கார்த்திகேயன்,25; என்பதும், இவர்கள் மூவரும் நெய்வேலி டவுன்ஷிப் ஜவஹர்லால் நேரு சாலையில் உள்ள என்.எல்.சி., அதிகாரி வீட்டில் கொள்ளையடிக்க திட்டம் தீட்டியது தெரியவந்தது.

அதன்பேரில் போலீசார் வழக்கு பதிந்து, மூவரையும் கைது செய்தனர்.