கடலுார் மாவட்டம், பண்ருட்டி அடுத்த புலவனுார்பேட்டை தெருவை சேர்ந்தவர் மணி. இவர், நேற்று முன்தினம் இயற்கை எய்தினார். இவரது துக்க நிகழ்ச்சியில் பங்கேற்க சென்னையில் இருந்து அவரது பேரன் அருள்முருகன், 35; இவரது மனைவி சுபஸ்ரீயுடன் வந்தார்.

அன்றைய தினம் மாலை இறுதி சடங்கு முடிந்ததும் குடும்பத்தினர் அனைவரும் இரவு வீட்டில் துாங்கிக் கொண்டிருந்தனர். நள்ளிரவு 1 மணிக்கு வீட்டிற்குள் புகுந்த மர்ம நபர், சுபஸ்ரீ அணிந்திருந்த 7 சவரன் தாலி செயினை பறித்தார். உடன், திடுக்கிட்ட அவர் கூச்சலிடேவ அருகில் இருந்தவர்கள், வருவதற்குள் மர்ம நபர் தப்பினார்.

இதையடுத்து பக்கத்து வீட்டில் துாங்கிக் கொண்டிருந்த சென்னையில் இருந்து துக்க நிகழ்ச்சிக்கு வந்த சிவானந்தன் மனைவி இருச்சம்மாள்,80; என்பவர் அணிந்திருந்த 3 சவரன் செயினையும் மர்ம நபர் பறித்து தப்பினார்.

இதேப் போன்று, அதே தெருவைச் சேர்ந்த முகமது ஹாரிஸ் மனைவி அப்ரின் என்பவர் அணிந்திருந்த 2 சவரன் தாலி செயினை மர்ம நபர் பறித்து தப்பினார். திருடு போன 12 சவரன் நகைகளின் மதிப்பு 8 லட்சம் ரூபாய் ஆகும்.

தகவலறிந்த பண்ருட்டி இன்ஸ்பெக்டர் வேலுமணி சம்பவ இடத்திற்கு சென்று விசாரணை நடத்தினார். மேலும், இது தொடர்பாக வழக்குப் பதிந்து மர்ம நபரை தேடி வருகிறார். கைரேகை நிபுணர்கள் தடயங்களை சேகரித்தனர். மோப்ப நாய் வரவழைக்கப்பட்டது. அடுத்தடுத்து 3 இடங்களில் நடந்த செயின் பறிப்பு சம்பவம் பரபரப்பை ஏற்படுத்தியுள்ளது.