பண்ருட்டி:பண்ருட்டி இந்திராகாந்தி சாலையில் சிறப்பு சாலை திட்டத்தின்கீழ் தேர்வு செய்யப்பட்ட பணி முடிவடையாமல் ஜவ்வாக இழுப்பதால் சாலையில் புழுதிப்படலம் ஏற்பட்டு பொதுமக்கள், வாகன ஓட்டிகள் கடும் அவதியடைந்து வருகின்றனர்.பண்ருட்டி பஸ் நிலையத்தில் இருந்து வெளியேறும் பஸ் உள்ளிட்ட வாகனங்கள் இந்திராகாந்தி சாலை வழியாக லிங்க்ரோட்டில் இணையும் பகுதியில் வடிகால் வசதி இல்லை. இதனால் சாலையில் கழிவுநீர் தேங்கி நின்றதால் அடிக்கடி இந்திராகாந்தி சாலை சேதமடைந்து குண்டும் குழியுமாக மாறி வந்தது.கடந்த ஆண்டு சிறப்பு சாலை திட்டத்தின் கீழ் இந்திராகாந்தி சாலையில் 180 மீட்டர் நீளம், 7 மீட்டர் அகலத்தில் தரமான தார் சாலை மற்றும் இருபுறமும் வடிகால் வசதி அமைக்க 20 லட்சம் ரூபாய் மதிப்பில் ஒப்பந்த பணியை கடலூர் எஸ்.ஜே.எம்.கன்ஸ்ட்ரக்ஷன் நிறுவனம் எடுத்திருந்தது.