நெல்லிக்குப்பம் நகராட்சி பகுதியில் சேரும் குப்பைகளை பல ஆண்டுகளாக திருக்குளம் பகுதியில் உள்ள குப்பை கிடங்கில் சேமித்து வருகின்றனர். பிளாஸ்டிக் கழிவுகள் அதிகமானதால் குப்பை மக்காமல் மலைபோல் குவிந்தது.

இதையடுத்து திருக்குளம் பகுதியில் மக்கும் குப்பை; மக்காத குப்பையாக தரம் பிரித்து சுத்தம் செய்து கொள்ள தனியார் நிறுவனத்துக்கு 72 லட்சத்துக்கு டெண்டர் விடப்பட்டு, பணிகள் நடந்து வருகிறது. இதன் காரணமாக குப்பையை கொட்ட முடியவில்லை.

இதற்கிடையே, சரவணபுரத்தில் மக்கும் குப்பையில் இருந்து உரம் தயாரிக்க 1 கோடி ரூபாய் மதிப்பில் இயந்திரங்கள் வாங்கி பணிகள் நடந்தது. ஆனால், தற்போது, உரம் தயாரிக்கும் திட்டம் கிடப்பில் உள்ளது. இதனால், நகரப் பகுதி சுகாதாரமற்ற நிலைக்கு மாறி வருகிறது. எனவே, இத்திட்டத்தை மீண்டும் செயல்படுத்த அதிகாரிகள் நடவடிக்கை எடுக்க வேண்டும்.