கலைக்கு செய்யும்மரியாதை

பிரசாத் சக்ரவர்த்தி, ஒய் 2மா அகாடமி நிறுவனர்: 25 ஆண்டுகளாக இந்த பயிற்சி மையத்தை நடத்தி வருகிறேன். இந்தாண்டின் 25வது கோடைகால பயிற்சி முகாமில் 160 மாணவ பயிற்சியாளர்கள் பங்கேற்றனர்.

மாணவர்கள் ஆர்வமுடன் கலைகளை கற்று தேர்வது எதிர்கால ஒளிமயமான இந்தியாவின் அறிகுறியாகவே தென்படுகிறது. பங்கேற்ற மாணவர்களுக்கு விருது, சான்றிதழ்

வழங்குகிறோம். இதுதவிர 20 ஆண்டுகளாக தமிழ்நாடு காவல்துறைக்கு யோகா, கரேத்தே மாஸ்டராகவும் பணிபுரிவதை கலைக்கு செய்யும் மரியாதையாகவே கருதுகிறேன்.

வாழ்வின் அங்கமாகி போனது

சிபின், ஏ.எஸ்.பி., திண்டுக்கல்: கற்ற கல்வியானது படகு போன்றது எனில் அதில் துடுப்பு என்பது உபரி கலைகளாகும். வெறும் கல்வியை கொண்டு சாதனையை நிகழ்த்தினால் அது நிரந்தரமாகாது. பல கலைகளை கற்றவர் பல மனிதர்களுக்கு சமமானவராவர். அந்த வகையில் குழந்தைகளின் கோடை விடுமுறை காலத்தில் அவர்களுக்கான பல்வேறு பயிற்சி கலைகள் கற்று தேர்ந்தது என்பது அவர்களின் வாழ்வில் அங்கமாகி உள்ளது என்பதை காலம் தரும் அனுபவத்தில் மாணவ குழந்தைகள் உணர்வர். கலைகளை கற்று தேர்வது மனித வாழ்வின் பலமானதாக அமையும் என்பதே அனுபவத்தில் நாங்கள் உணர்ந்த உண்மை.

பூவுக்குள் புயலை கண்டோம்

நான்சி புளோரிடா, ஸ்ரீசைதான்யா டெக்னோ பள்ளி முதல்வர்: குழந்தைகளை அவர்கள் வழியில் கொண்டு சென்று திறமைகளை கண்டறிந்து வளர்க்கும் முயற்சியே கோடைக்கால சிறப்பு பயிற்சி முகாமின் நோக்கமாகும். விருதுகள் வெற்றியின் அடையாளமாகாது. அது ஒரு கலைதேர்ச்சியின் அடையாளமாகவே காண வேண்டும்.

கல்லை சிற்பமாக்கும் முயற்சியை போல் கற்று கொடுக்கும் ஆசிரியர்கள் உள்ளதை ஒய் 2மா அகாடமி வெளிப்படுத்தி உள்ளது. பல மழலைகள் கராத்தே பயிற்சி பெற்ற நிலையில் பூவுக்குள் உள்ள புயலை கண்டு அதிர்ந்து போனோம் .

அனைவருக்கும் கற்று தருவேன்

லலிதா, முதல் வகுப்பு மாணவி: இந்த பயிற்சியில் யோகா கற்று கொண்டேன். மிகவும் எளிதாக கற்று கொடுத்ததால் யோகாவில் ஆர்வம் அதிகரித்துள்ளது.

இதை எனது பள்ளி ஆசிரியர்களிடம் செய்து காட்டி பாராட்டை பெறுவதில் ஆர்வமாய் இருக்கிறேன். அதற்காக பள்ளி திறக்கும் நாளை ஆவலுடன் எதிர்பார்த்து காத்திருக்கிறேன். நான் கற்ற யோகாவையும் வீட்டில் அனைவருக்கும் கற்று தருவேன்.

நம்பிக்கை ஏற்பட்டுள்ளது

நிஷாந்த், 5ம் வகுப்பு மாணவர்: எனது தந்தை போலீஸ் துறையில் பணியாற்றி வருகிறார். தற்காப்பு கலைகளை கற்று தேர்வது மனித வாழ்வின் ஒரு பகுதியாகும் என்ற அவரது அறிவுரைப்படியாக நான் இந்த பயிற்சி பள்ளியில் சேர்ந்தேன்.

ஒரு மாத கால பயிற்சிக்கு பின் தற்போது கராத்தே, சிலம்பம், யோகா, நீச்சல், நடனம், கீபோர்டு இசை கருவிகளில் ஓரளவு தேர்ச்சி கண்டுள்ளேன்.எனது எதிர்கால லட்சியமான கலெக்டர் ஆவதற்கு இந்த பயிற்சிகள் பெரிதும் உதவும் என்ற நம்பிக்கை ஏற்பட்டுள்ளது.