திண்டுக்கல் மாநகராட்சி கவுன்சிலர்கள் கூட்டம் மேயர் இளமதி (தி.மு.க.,) தலைமையில் நடந்தது. துணை மேயர் ராஜப்பா (தி.மு.க.,), கமிஷனர் ரவிச்சந்திரன், உதவி கமிஷனர் வரலட்சுமி, செயற்பொறியாளர் சுப்பிரமணியன், சுகாதார ஆய்வாளர் தட்சிணாமூர்த்தி முன்னிலை வகித்தனர்.

கவுன்சிலர்கள் விவாதம்

ஆனந்த் (தி.மு.க.,): தியேட்டர்கள் முன்பு பேனர்கள் வைப்பதை தடுக்க நடவடிக்கை எடுக்க வேண்டும். மாநகராட்சிக்கு சொந்தமான வாகன பார்க்கிங்களில் தண்ணீர் உள்ளிட்ட வசதிகள் செய்து தர வேண்டும்.

மேயர்: நடவடிக்கை எடுக்கப்படும்.

சித்திக் (தி.மு.க.,): ரவுண்ட் ரோடு புதிய ரோடுகளை மறுசீரமைப்பு செய்ய வேண்டும்.

மேயர்: சப்ஜெட்டில் இருப்பதை மட்டும் பேசுங்கள். வார்டு பிரச்னைகளுக்கு நேரம் ஒதுக்கப்படும்.

தனபால் (பா.ஜ.,): விவேகானந்தாநகரில் 7 ஆண்டுகளுக்கு முன் பூங்கா கட்டப்பட்டு பாதி பணியுடன் கிடப்பில் உள்ளது. பூங்காவை செயல்பாட்டிற்கு கொண்டு வந்தால் மக்கள் பயனடைவர்.

மாரியம்மாள் (மார்க்சிஸ்ட்): மழை நேரத்தில் கழிவுநீர் வீடுகளுக்குள் புகுந்து விடுகிறது. பல முறை அதிகாரிகளிடம் தெரிவித்தும் நடவடிக்கை இல்லை.

மேயர்: நடவடிக்கை எடுத்தப்படும்.

தனபால் (பா.ஜ.,): அண்ணாநகரில் உள்ள குடிநீர் தொட்டி பராமரிப்பு செய்யாமல் உள்ளது. மற்றபகுதி தொட்டிகளை பராமரிப்பு செய்யும் அதிகாரிகள் இதையும் சேர்த்து கொள்ளுங்கள்.

மேயர்: உங்கள் கோரிக்கை நிறைவேற்றப்படும்.

ஜோதிபாசு (மார்க்சிஸ்ட்): ரோடு விரிவாக்க பணிகளின் போது நெடுஞ்சாலைத்துறையினர் பழைய மின் கம்பங்களை அகற்றாமல் அப்படியே விட்டு சென்றுள்ளனர்.

ஜான்பீட்டர் (தி.மு.க.,): அனுமந்தநகர் பாலம், திருச்சி ரோடு ரயில்வே பாலம்,கரூர் ரோடு பாலம் உள்ளிட்ட பாலங்கள் பராமரிப்பின்றி உள்ளது. சர்வீஸ் ரோடுகளும் சேதமாக உள்ளது. ஆண்டுகள் கடந்தும் பிரச்னைகளுக்கு தீர்வு இல்லை.

கணேசன் (மார்க்சிஸ்ட்): நாய், மாடுகள் உள்ளிட்ட கால்நடைகள் நகரில் எந்நேரமும் சுற்றித்திரிகின்றன.

பாஸ்கரன் (அ.தி.மு.க.,): கழிப்பறை மோசமாக உள்ளது. புகாரளித்தாலும் நடவடிக்கை எடுக்காமல் என் வார்டை புறக்கணிக்கிறீர்கள். ரோடுகள் புதிதாக அமைத்த சில மாதங்களிலே சேதமாகிறது. ஏன் மக்கள் வரிப்பணத்தை வீணடிக்கிறீர்கள்.

மேயர்: கோரிக்கைகளை எழுத்து பூர்வமாக எழுதி கொடுங்கள்.

தனபால், (பா.ஜ.,): 14வது வார்டில் 114 தெரு நாய்கள் சுற்றுகின்றன. இதைப்பிடிக்க மாநகராட்சி முன்வரவில்லை. இரவு நேரத்தில் ரோட்டில் நடக்கவே முடியவில்லை.

மேயர்:நகரில் 7000 தெருநாய்கள் உள்ளது. 3500க்கு மேலான நாய்களுக்கு கருத்தடை,ரேபிஸ் தடுப்பூசி செலுத்தும் நடவடிக்கைகள் மேற்கொள்ளப்பட்டுள்ளது.

இவ்வாறு விவாதம் நடந்தது.

கூட்டம் துவங்குவதற்கு முன் தே.மு.தி.க., தலைவர் விஜயகாந்திற்கு மவுன அஞ்சலி செலுத்தப்பட்டது.