UPDATED : அக் 09, 2026 07:42 PM
ADDED : அக் 09, 2026 07:37 PM
சாணார்பட்டி: சாணார்பட்டி அருகே அப்பள வியாபாரி கொலை வழக்கில் மேலும் ஒருவர் கைது செய்யப்பட்டார்.
திண்டுக்கல் மேட்டுப்பட்டியை சேர்ந்த மாநகராட்சி குத்தகைதாரர் முருகன், ஜூலை 23ல் காரில் கடத்திச்சென்று வெட்டிக்கொலை செய்யப்பட்டார். இந்த வழக்கில் திண்டுக்கல் ஆர்.எம்., காலனி அப்பள வியாபாரி வீரபத்திரன் 34, உட்பட 8 பேரை சாணார்பட்டி போலீசார் கைது செய்து சிறையில் அடைத்தனர்.
ஜாமினில் வெளி வந்த வீரபத்திரன் அக்.,6 காலை சாணார்பட்டி ஸ்டேஷனில் கையெழுத்திட்டு விட்டு டூவீலரில் வீடு திரும்பினார். நொச்சி ஓடைப்பட்டியில் வழிமறித்த கும்பல் வீரபத்திரனை வெட்டிக்கொலை செய்தது.
பழிக்கு பழியாக நடந்த இந்த கொலையில் 11 பேரை தனிப்படை போலீசார் கைது செய்தனர். நேற்று நல்லாம்பட்டியை சேர்ந்த ராஜாவை 45. சாணார்பட்டி போலீசார் கைது செய்தனர். முக்கிய குற்றவாளியான ரங்கராஜன் உட்பட மேலும் 4 பேரை தேடி வருகின்றனர்.
