கோடை விடுமுறை துவங்கியுள்ளதால் சுற்றுலா பயணிகள் ரயில்களில் பயணிக்க துவங்கியுள்ளனர்.

பயணிகள் கூட்ட நெரிசலை கருத்தில் கொண்டு விழுப்புரத்தில் இருந்து மதுரை வழியாக ராமேஸ்வரத்திற்கு ஏப்., 19 முதல் மே 31 வரை வாரத்தில் 3 நாட்கள் வீதம் 19 சிறப்பு ரயில்களை இயக்க அதிகாரிகள் பரிந்துரை அனுப்பியுள்ளனர்.

அதன்படி சனி, ஞாயிறு, திங்கள்கிழமைகளில் விழுப்புரத்தில் அதிகாலை 4:15 மணிக்கு புறப்படும் சிறப்பு ரயில், திருச்சியில் காலை 6:40 மணி, திண்டுக்கல்லில் காலை 7:50 மணி, மதுரையில் காலை 9:10 மணிக்கு புறப்பட்டு ராமேஸ்வரத்திற்கு காலை 11:40 மணிக்கு சென்றடையும்.

அதே நாட்களில் மதியம் 1:45 மணிக்கு ராமேஸ்வரத்தில் இருந்து புறப்படும் ரயில் மதுரையில் மாலை 4:10 மணி, திண்டுக்கல்லில் மாலை 5:00 மணி, திருச்சியில் மாலை 6:15 மணிக்கு புறப்பட்டு விழுப்புரத்திற்கு இரவு 8:45 மணிக்கு சென்றடையும்.

16 சதாப்தி ரக ரயில் பெட்டிகளை கொண்ட முன்பதிவு ரயிலாக இயக்கலாம் எனவும், ரயில்வே நிர்வாக ஒப்புதல் கிடைத்ததும் ஒரிரு நாளில் இந்த சிறப்பு ரயில் குறித்த அறிவிப்பு வெளியாகும் எனவும் அதிகாரிகள் தெரிவித்தனர்.