ஒட்டன்சத்திரம் பரப்பலாறு அணை அதன் முழு அளவை எட்டுவதற்கு இன்னும் 25 அடி உள்ளது. கொடைக்கானல் மலைப்பகுதியில் நல்ல மழை பெய்துள்ளதால் பழநி வரதமாநதி அணை நிரம்பி உள்ளது. பாலாறு, பொருந்தலாறு அணை, குதிரையாறு அணை இன்னும் நிரம்பவில்லை. ஆத்துார் காமராஜர் நீர்த்தேக்கமும் இன்னும் நிரம்பவில்லை. மழை நீர் இன்னும் எட்டி கூட பார்க்காத குளங்கள் அதிகம் உள்ளன.

சில குளங்கள் கால் பகுதி அளவு மட்டும் நிரம்பி உள்ளது 2024ல் ஏற்பட்ட நீர்வரத்தே பெரும்பாலான குளங்களில் இன்னும் உள்ளது. இவையும் வற்றி வருவதால் சுற்றிய விவசாய கிணறுகளில் நீர்மட்டம் குறைந்து வருகிறது. நவம்பர் மாதத்திற்குள் பரப்பலாறு அணை முழு அளவை எட்டி உபரி நீர் அதன் கீழ் உள்ள குளங்களுக்கு செல்வது வழக்கம்.

ஆனால் இந்தாண்டு அணை இன்னும் நிரம்ப வில்லை. இதே போல் முக்கிய நீர் தேக்கங்களான கொத்தையம் நல்லதங்காள் அணைக்கட்டு, இடையகோட்டை நங்கஞ்சியாரு நீர்த்தேக்கத்தில் நீர் வரத்து குறைவாக உள்ளது. கிணறுகளிலும் நீர்மட்டம் குறைந்து வருகிறது. இதே நிலை நீடித்தால் வேளாண் தொழில் செய்வது மிகவும் சிரமம் என விவசாயிகள் கவலை அடைந்துள்ளனர்.